ទូរស័ព្ទ iPhone 7 និង iPhone 7 Plus នឹងត្រូវក្រុមហ៊ុន Apple សម្ពោធផ្លូវការនៅអំឡុងខែកញ្ញាខាងមុខ ហើយបើតាមរបាយការណ៍ថ្មីចុងក្រោយនេះ អះអាងឱ្យដឹងថាកំពូលទូរស័ព្ទទាំងពីរម៉ូដែលនឹងអាចប្រើស៊ីមកាតបាន២។ ទូរស័ព្ទ iPhone ដែលចរាចរលើទីផ្សារបច្ចុប្បន្នគឺអាចប្រើបានត្រឹមតែស៊ីម១ ប៉ុណ្ណោះ។ យើងធ្លាប់ឮចចាមអារ៉ាមកន្លងមកថា iPhone ជំនាន់ថ្មី នឹងត្រូវដករន្ធកាស ៣,៥មិល្លីម៉ែត្រចេញ ហើយប្រើរន្ធ Lightning សម្រាប់ប្រព័ន្ធសំឡេង (Audio)។

បើតាមរូបដែលបានទម្លាយដោយក្រុមហ៊ុនជួសជុលស្មាតហ្វូនឈ្មោះ Rock Fix មានមូលដ្ឋាននៅចិន បានបង្ហាញឱ្យឃើញរន្ធ Lightning នៅតែបំពាក់នៅលើ iPhone 7 ហើយរន្ធកាស 3.5mm នៅតែរក្សាដដែល។ ចំណែក iPhone 7 Plus ត្រូវគេអះអាងទៀតថា នឹងពុំទាន់បំពាក់កាមេរ៉ាភ្លោះនៅផ្នែកខាងក្រោយ ដូចចចាមអារ៉ាមកន្លងមកនោះទេ គឺដោយសារជួបបញ្ហាបច្ចេកទេសនៅពេលផលិត។

ទោះជាយ៉ាងណា សម្រាប់របាយការណ៍ថ្មីនេះវិញ បានលើកឡើងផ្ទុយគ្នាវិញថា iPhone ជំនាន់ទី១០ ទាំងពីរនេះ នឹងនៅរក្សារន្ធកាស headphone jack ដដែល។ ម្យ៉ាងទៀតវានឹងមានរចនាបថស្រដៀងខ្លាំងទៅនឹងរូបរាង iPhone 6s និង 6s Plus។

ចំណែក Hardware លើ iPhone ជំនាន់ថ្មីនេះ នឹងទទួលបានការអភិវឌ្ឍកាន់តែមានសមត្ថភាពជាងមុន ដោយបំពាក់ឈីបថ្មីគឺ Apple A10 ហើយមានទំហំ RAM ធំជាងមុន។ គេរំពឹងថា អេក្រង់ និងកាមេរ៉ារបស់ iPhone 7/7 Plus ក៏នឹងត្រូវអភិវឌ្ឍទំនើបជាងមុនផងដែរ ហើយនឹងដំណើរការដោយ iOS 10 ដែលទើបប្រកាសចេញនាពេលថ្មីៗនេះ។ iPhone 7 និង iPhone 7 Plus ត្រូវគេរំពឹងថា នឹងត្រូវក្រុមហ៊ុន Apple សម្ពោធចេញផ្លូវការនៅខែកញ្ញាខាងមុខ៕