ជាការពិត Facebook នាពេលបច្ចុប្បន្នគឺជាបណ្ដាញសង្គមទំនាក់ទំនងរវាងមនុស្សជុំវិញពិភពលោក ដ៏មានប្រជាប្រិយភាពបំផុត និងមានមនុស្សប្រើប្រាស់ច្រើនជាងបណ្ដាញសង្គមដទៃ។ ដោយសារតែបែបនេះ អ្នកប្រើទូរស័ព្ទ មិនថាជាស្មាតហ្វូនទំនើប ឬធុនមធ្យមគឺសុទ្ធតែបានដំឡើងប្រើ Facebook app នៅលើទូរស័ព្ទរបស់ខ្លួន ដើម្បីងាយស្រួលភ្ជាប់ទំនាក់ទំនង។ ចុះតើប្រិយមិត្តមានដឹងទេ អំពីចំណុចមួយចំនួន ដែលកម្មវិធី Facebook បង្កឡើងនៅលើស្មាតហ្វូន Android របស់អ្នក? ខាងក្រោមនេះ គឺជាចំណុចមួយចំនួន ដែលទូរស័ព្ទរបស់អ្នកនឹងទទួលរ៉ាប់រងនៅពេលអ្នកដំឡើង Facebook ចូលទៅ៖ ១) កម្មវិធី Facebook នឹងធ្វើឱ្យទូរស័ព្ទឆាប់អស់ថ្មជាងការប្រើធម្មតា

យោងតាមបណ្ដាអ្នកសរសេរអត្ថបទតាម blog វែបសាយ និងការបញ្ចេញមតិជាច្រើន បានអះអាងថា កម្មវិធី Facebook គឺធ្វើឱ្យថ្មទូរស័ព្ទឆាប់អស់ជាងធម្មតា ព្រោះបើទោះជាអ្នកបានបិទវាហើយក៏ដោយ ប៉ុន្តែវានៅតែដំណើរការលក្ខណៈ background ជាប់ជានិច្ច។ បើតាមគេហទំព័រ The Guardian អះអាងថា ការលុបកម្មវិធី Facebook ចេញ គឺអាចសន្សំសំចៃថ្មទូរស័ព្ទបានប្រហែល ២០%។ ២) Facebook ធ្វើឱ្យទូរស័ព្ទរបស់អ្នក មានដំណើរការយឺតជាងមុន

តាមការធ្វើតេស្តពីអ្នកជំនាញស្មាតហ្វូន បានបង្ហាញថា ការប្រើប្រាស់កម្មវិធី Facebook អាចធ្វើឱ្យម៉ាស៊ីនទូរស័ព្ទដំណើរការយឺតជាងមុនបន្តិច ឬយឺតជាងមុនច្រើន អាស្រ័យលើ ថាតើទូរស័ព្ទរបស់អ្នកជាប្រភេទស្មាតហ្វូនសមត្ថភាពខ្ពស់ ឬមធ្យម ឬទាប។ ជាការពិតណាស់ ប្រហែលប្រិយមិត្តមួយចំនួនដែលប្រើ iPhone ឬ Galaxy ស៊េរីក្រោយៗ ប្រហែលមិនសូវបានចាប់អារម្មណ៍ទៅលើល្បឿននោះទេ ប៉ុន្តែអ្នកប្រើទូរស័ព្ទធុនមធ្យមអាចកត់សម្គាល់ពីល្បឿនទូរស័ព្ទខ្លួនក្រោយពីប្រើប្រាស់ Facebook បានមួយរយៈពេល។ តាមការពិសោធន៍ គេបានលុបកម្មវិធី Facebook ចេះ ហើយទូរស័ព្ទក៏មានល្បឿនលឿនជាងមុនប្រហែល ១៥%។ ៣) ការឆែក Facebook នឹងធ្វើឱ្យអស់លុយអ៊ីនធឺណិតទូរស័ព្ទ

វាជារឿងធម្មតាទេដែល Facebook ត្រូវការអ៊ីនធឺណិតដើម្បីអាចឱ្យអ្នកអនឡាញ ឆែកមើលមាតិកា និងឆាតជាមួយ friend បាន។ យ៉ាងណា ក្រុមហ៊ុន Facebook បានដាក់ចេញគម្រោងចែកចាយអ៊ីនធឺណិតហ្វ្រីក្នុងការប្រើប្រាស់ Facebook ដោយឥតគិតថ្លៃ។ ហើយក្នុងនោះ ប្រទេសកម្ពុជា ក៏កំពុងទទួលយកសេវាកម្មនេះផងដែរ ដែលមានក្រុមហ៊ុន Smart Axista ជាអ្នកផ្ដល់ឱ្យអតិថិជនប្រើប្រាស់ Facebook ដោយឥតគិតថ្លៃ (មានកំណត់លើប្រភេទមាតិកា) ៤) ដំឡើង Facebook នឹងធ្វើឱ្យទូរស័ព្ទត្រូវចំណាយមេម៉ូរីដើម្បីរក្សាទិន្នន័យ

កម្មវិធី Facebook សម្រាប់ប្រព័ន្ធ Android ក្រោយពេលដំឡើងចូលទៅទូរស័ព្ទរួច វាអាចពន្លាចេញជាឯកសារមួយចំនួនដើម្បីគាំទ្រកម្មវិធីឱ្យដំណើរការ ហើយទំហំសរុបក្រោយដំឡើងគឺមិនទៀងទាត់ទេ គឺអាស្រ័យលើជំនាន់ Android OS តែទូរស័ព្ទខ្លះអាចត្រូវការមេម៉ូរីទំហំប្រហែល 390MB ឬច្រើនជាងនេះ។ ដូច្នេះ ប្រសិនស្មាតហ្វូនរបស់អ្នកជិតអស់មេម៉ូរី គួរតែលុបឯកសាររូប និងវីដេអូដែលមិនសំខាន់ចេញជាមុនសិន ចាំដំឡើង Facebook និង Messenger ឱ្យដំណើរការបានស្រួល៕