Galaxy Note 7 បានក្លាយជាប្រធានបទក្ដៅមួយខណៈ ដែល Samsung បានត្រៀមខ្លួនសម្ពោធនៅដើមខែសីហាខាងមុខ។ ចំណុចលេចធ្លោប្លែកពីគេមួយនៅលើ Note 7 គឺត្រូវគេអះអាងថា នឹងបំពាក់មកជាមួយបច្ចេកវិទ្យាស្កេនប្រស្រីភ្នែកIris Scanner។ Iris Scanner នឹងរឹតតែផ្ដល់សុវត្ថិភាពខ្ពស់ក្នុងការប្រើទូរស័ព្ទ ជាក់ស្ដែងគេនឹងអាចប្រើវាសម្រាប់បើកសោស្មាតហ្វូនបាន។ បើផ្អែកតាមរូប screenshort ដែលទើបបែកធ្លាយចេញពីគេហទំព័រ weibo ខាងលើ គេសង្កេតឃើញ មានរូបរង្វង់ធំៗមួយគូនៅលើអេក្រង់អមជាមួយឃ្លា “Use Iris or draw pattern”។

  តាមរយៈ screenshort ខាងលើ ត្រូវបានគេអះអាងថា ផេប្លេត Note 7 ពិតជាមានមុខងារស្កេនប្រស្រីភ្នែកដូចទៅនឹងរបាយការណ៍និងចចាមអារ៉ាមកន្លងមកពិតមែន។ ក្រៅពីមុខងារលេចធ្លោនេះ គេរំពឹងថា Note 7 នឹងត្រូវបំពាក់កាមេរ៉ាក្រោយចំនួនពីរគ្រាប់ ហើយមានបច្ចេកវិទ្យាមិនជ្រាបទឹក IP68។

  ប្រភពដដែលបានអះអាងថា មុខងារស្កេនប្រស្រីភ្នែកនៅលើ Note 7 ប្រើពេលមិនដល់ ១វិនាទីទេ សម្រាប់ដោះសោទូរស័ព្ទម្ដងៗ ហើយគេអាចចាក់សោទូរស័ព្ទដោយប្រើមុខងារស្កេនក្រយៅដៃដែលនឹងមាននៅលើប៊ូតុង Home ក៏បាន។ ក្រុមហ៊ុន Samsung បានប្រកាសនឹងប្រារព្ធព្រឹត្តិការណ៍ Unpacked នៅថ្ងៃទី២ ខែសីហាខាងមុខ ហើយគេរំពឹងថា Note 7 ក៏នឹងបង្ហាញខ្លួនផ្លូវការនៅក្នុងពេលនោះផងដែរ៕