ទីបំផុតក្រុមហ៊ុន Lenovo បានសម្រេចតាមផែនការ ផលិតចេញស្មាតហ្វូនដើរដោយប្រព័ន្ធសូហ្វ៊ែរ Windows មែនហើយ បន្ទាប់ពីបានបង្ហើបតាំងពីប៉ុន្មានឆ្នាំមុន។ ក្រុមហ៊ុនទូរស័ព្ទ និងផលិតទាំងកុំព្យូទ័រផងនេះ បានប្រកាសចេញស្មាតហ្វូនដំណើរការដោយ Windows 10 មានឈ្មោះថា Softbank 503LV អមជាមួយសមត្ថភាពខ្ពស់។ Softbank 503LV គឺជាស្មាតហ្វូនដំបូងរបស់ Lenovo ដែលគ្រងឯកសណ្ឋាន Windows Mobile របស់ Microsoft។

  លក្ខណៈសម្បត្តិនៅលើ Softbank 503LV នេះរួមមាន៖ អេក្រង់ ៥អ៊ីញកម្រិត 1280x720px បំពាក់ដោយបន្ទីឈីប Qualcomm Snapdragon 617 ប្រភេទ octa-core SoC ល្បឿន 1.5GHz, មាន RAM 3GB ចំណែកមេម៉ូរីម៉ាស៊ីនទំហំ 32GB និងអាចបន្ថែម microSD ដល់ 128GB។ កាមេរ៉ាមុខរបស់ស្មាតហ្វូន Windows 10 នេះមានទំហំ 5MP ខណៈ ដែលកាមេរ៉ាក្រោយរបស់វាទំហំ 8MP។ ស្មាតហ្វូន Softbank 503LV គាំទ្រ Bluetooth 4.0, 4G LTE និង Wi-Fi Connectivity។ បើតាមគេហទំព័រ MSPoweruser បានបញ្ជាក់ថា ទូរស័ព្ទនេះមានកម្រិតថ្ម 2250mAh មានកម្រាស់ ៧,៦៦មិល្លីម៉ែត្រ និងទម្ងន់ ១៤៤ក្រាម។ ទូរស័ព្ទ Windows 10 របស់ Lenovo ដំបូងនេះនឹងមានលក់លើទីផ្សារចាប់ពីខែតុលាខាងមុខ។ ចំពោះតម្លៃ ពុំទាន់ត្រូវក្រុមហ៊ុនបញ្ជាក់នៅឡើយ៕ ចុះប្រិយមិត្តវិញ យល់ថា ១គ្រឿងថ្លៃប៉ុន្មានដែរ ដោយផ្អែកលើលក្ខណៈសម្បត្តិដែលបានរៀបរាប់ខាងលើ?