ឆ្លើយតបនឹងការសន្យាដាក់បញ្ចូលមុខងារបង់ប្រាក់តាមទូរស័ព្ទដៃរបស់ Samsung តាំងពីពេលប្រកាសចេញនាឡិកាឆ្លាតវៃ Gear S2 ក្នុងឆ្នាំ២០១៥ កន្លងទៅ ពេលនេះ ក្រុមហ៊ុនអេឡិចត្រូនិកយក្សនេះ បានធ្វើតាមការសន្យាហើយ។ ក្រុមហ៊ុន Samsung បានបញ្ចូលមុខងារ Samsung Pay ទៅលើ Smartwatch ម៉ូដែល Gear S2 ប៉ុន្តែវាស្ថិតនៅជំនាន់សាកល្បង (beta) នៅឡើយ។

  មុខងារបង់ប្រាក់ទាន់សម័យនេះ អាចដំណើរការបានគឺត្រូវមានមុខងារ NFC។ នៅពេលនេះ អ្នកប្រើនាឡិកា Gear S2 អាចសាកល្បងដំណើរការមុខងារ Samsung Pay ដោយខ្លួនឯងបាន ខណៈដែលវាស្ថិតនៅត្រឹមជាសូហ្វ៊ែរក្រោមការកែតម្រូវមិនទាន់រលូននៅឡើយ។ ដើម្បីទទួលបានមុខងារ Samsung Pay គឺតម្រូវឱ្យអ្នកប្រើធ្វើបច្ចុប្បន្នភាពសូហ្វ៊ែរនៅលើកម្មវិធី Samsung Gear ជាមុនសិន។ នៅពេលធ្វើបច្ចុប្បន្នភាពរួចហើយ គ្រាន់តែចុចលើជម្រើស Samsung Pay Beta នៅក្នុងកម្មវិធី Gear ដែលបានអាប់ដេតរួច ដើម្បីចាប់ផ្ដើមជាការស្រេច។ អ្នកអាចបញ្ចូលព័ត៌មានអំពីកាតឥណទាន ឬកាតឥណពន្ធទៅក្នុងកម្មវិធី Samsung Pay ដើម្បីអាចទូទាត់ថ្លៃចំណាយលើឥវ៉ាន់តាមផ្សារទំនើបបាន៕ ប្រែសម្រួល៖ រឹទ្ធិរាជ ប្រភព៖ theverge