នៅឆ្នាំ២០១៦ នេះ បច្ចេកវិទ្យាស្មាតហ្វូនពិតជាមានការអភិវឌ្ឍយ៉ាងខ្លាំង ដោយបណ្ដាក្រុមហ៊ុនទូរស័ព្ទធំៗសុទ្ធតែបានខិតខំបង្កើតសមត្ថភាព បច្ចេកវិទ្យា និងមុខងារនៅលើស្មាតហ្វូនស៊េរីក្រោយៗរបស់ខ្លួន។ សង្កេតឃើញប៉ុន្មានខែចុងក្រោយ ព័ត៌មានអំពីកំពូលទូរស័ព្ទ iPhone 7 ត្រូវបានចុះផ្សាយព្រោងព្រាត ស្របពេលដែល Note 7 ក៏កំពុងមានព័ត៌មានយ៉ាងច្រើនផងដែរ ថានឹងមានបច្ចេកវិទ្យាទំនើបលើសគេ គឺមុខងារស្កេនប្រស្រីភ្នែក។ ខាងក្រោមនេះ គឺជាកំពូល Smartphone ជំនាន់ថ្មី ៧ម៉ូដែល ដែលកំពុងត្រៀមខ្លួនបង្ហាញវត្តមានលើពិភពលោកក្នុងពេលឆាប់ៗ គឺនៅអំឡុងឆមាសទី២ ឆ្នាំ២០១៦ នេះតែម្ដង។ តោះទៅមើលស្មាតហ្វូន ៧ម៉ូដែលនេះ តើក្រៅពី iPhone 7 និង Note 7 នៅមានម៉ូដែលណាខ្លះទៀត? ១) Galaxy Note 7

ស្មាតហ្វូន កូនកាត់ថេប្លេតនេះ ត្រូវគេរំពឹងថា នឹងត្រូវប្រកាសចេញផ្លូវការដោយក្រុមហ៊ុន Samsung អំឡុងព្រឹត្តិការណ៍ Unpacked នៅថ្ងៃទី២ ខែសីហាក្រោយនេះ ជាមួយមុខងារ និងបច្ចេកវិទ្យាថ្មីៗជាច្រើន។ ក្នុងនោះ ត្រូវគេរំពឹងថា នឹងមានបច្ចេកវិទ្យាស្កេនប្រស្រីភ្នែក បច្ចេកវិទ្យាមិនជ្រាបទឹក កាមេរ៉ាក្រោយចំនួន២ ទំហំ 12MP អមដោយបច្ចេកវិទ្យា Dual Forcus ដែលមាននៅលើ S7។ អេក្រង់ Note 7 នឹងមានទំហំ ៥,៧អ៊ីញ Quad HD Super AMOLED។ បំពាក់ឈីប Snapdragon 821 និងជម្រើស Exynos 8893 SoC។ រន្ធ USB-C ជំនាន់ថ្មី ក៏ត្រូវគេរំពឹងនឹងមានលើ Note 7 ផងដែរ។ ២) iPhone 7 និង iPhone 7 Plus

ចំណុចពិសេសលើ iPhone 7 ដែលគេរំពឹង គឺនឹងមានកាមេរ៉ាភ្លោះនៅខាងក្រោយ ប៉ុន្តែរចនាបថហាក់មិនមានអ្វីប្លែកពី iPhone 6s ឡើយ។ គ្រាន់តែមានការប្ដូរទីតាំងខ្សែអង់តែនពណ៌-ស ទៅផ្នែកខាងលើវិញប៉ុណ្ណោះ។ កាមេរ៉ា lens នៅលើ iPhone 7 នឹងធំជាងរបស់ iPhone 6s។ រន្ធកាស 3.5mm នឹងត្រូវដកចេញ ជំនួសមកវិញដោយរន្ធ Lightning ជំនាន់ថ្មីដែលអាចប្រើបានទាំងសាកថ្ម និងដោតកាស។ iPhone 7/ 7 Plus នឹងបំពាក់ដោយឈីបជំនាន់ថ្មី Apple A10 ដំណើរការលឿនជាងមុន។ ៣) Google Nexus Sailfish និង Marlin

ជាកំពូលស្មាតហ្វូនរបស់ក្រុមហ៊ុន Google ត្រកូល Nexus អមដោយលក្ខណៈសម្បត្តិខ្ពស់។ ម៉ូដែល Nexus Sailfish មានអេក្រង់ ៥អ៊ីញ ចំណែក Marlin ទំហំ ៥,៥អ៊ីញ។ ស្មាតហ្វូនទាំងពីរត្រូវគេរំពឹងថា នឹងបំពាក់ដោយឈីបជំនាន់ចុងក្រោយ Snapdragon 82x, អមដោយកាមេរ៉ា 12MP, បច្ចេកវិទ្យាស្កេនក្រយៅដៃនៅផ្នែកខាងក្រោយ កម្រិតថាមពលថ្មខ្ពស់។ ៤) ស្មាតហ្វូន Nokia ថ្មីដើរដោយ Android ចំនួន ២ម៉ូដែល

បណ្ដាញសារព័ត៌មានជាច្រើន បានរំពឹងថា ចុងឆ្នាំ២០១៦ នេះ ក្រុមហ៊ុនទូរស័ព្ទ Nokia នឹងមានអ្វីថ្មី សម្រាប់ចែកជូនសាធារណជន បន្ទាប់ពីបានបាត់មុតអស់មួយរយៈពេល ពោលគឺក្រោយពេល Microsoft ទិញយកជំនួញទូរស័ព្ទ។ គេរំពឹងថា Nokia កំពុងអភិវឌ្ឍស្មាតហ្វូនស៊េរីថ្មីដើរដោយ Android OS ចំនួនពីរម៉ូដែល មានសមត្ថភាពខ្លាំង ដើម្បីប្រកួតប្រជែងទីផ្សារស្មាតហ្វូនទំនើបនាពេលបច្ចុប្បន្ន។ ៥) LG V20

បន្ទាប់ពីបានប្រកាសចេញ LG V10 និងទទួលបានការចាប់អារម្មណ៍ខ្លាំងពីអតិថិជនរួចមក ពេលនេះ ក្រុមហ៊ុន LG កំពុងអភិវឌ្ឍស្មាតហ្វូនត្រកូល V បន្តទៀត នោះគឺ LG V20។ V20 នឹងមានអេក្រង់ ៥,៧អ៊ីញ មានការឌីហ្សាញទាន់សម័យស្ដើងស្អាត កាមេរ៉ាសមត្ថភាពខ្ពស់។ ៦) BlackBerry Argon

ស្មាតហ្វូនកាណាដា BlackBerry Argon ត្រូវគេរំពឹងថា នឹងបង្ហាញខ្លួនជាមួយសមត្ថភាពខ្ពស់ មានអេក្រង់ ៥,៥អ៊ីញ កាមេរ៉ា 21MP, ប្រើប្រភេទ QWERTY keyboard។ ៧) Sony Xperia X2

ស្មាតហ្វូន Sony នឹងមានលេខកូដ Xperia F8331 នេះ ត្រូវគេរំពឹងថា នឹងបំពាក់មកជាមួយគុណភាពកាមេរ៉ាខ្ពស់ ថតច្បាស់ អមដោយ dual LED flash មានរន្ធ USB Type-C នៅផ្នែកខាងក្រោម មាន speaker នៅផ្នែកខាងមុខ និងមានបច្ចេកវិទ្យាស្កេនក្រយៅដៃ៕