ក្រុមហ៊ុន Microsoft កំពុងបន្តពង្រីកជំនួញកុំព្យូទ័រយីហោ Surface ដោយត្រៀមលក្ខណៈក្នុងការប្រកាសចេញកុំព្យូទ័រ Surface ម៉ូតថ្មីមិនធ្លាប់មាន គឺប្រភេទ all-in-one PC វិញម្ដង។ កុំព្យូទ័រជំនាន់ក្រោយស្ថិតក្នុងសែស្រឡាយ Surface នឹងត្រូវអភិវឌ្ឍបន្តជាទាយាទរបស់កុំព្យូទ័រ Surface Book។

  ប្រភពដដែលឱ្យដឹងថា Surface All-in-one ដែលមានទំហំអេក្រង់តូចជាងគេគឺ ២១អ៊ីញនោះ មានកម្រិតភិចហ្សែលត្រឹម 1080p បើប្រៀបធៀបនឹង ម៉ូដែលទំហំ ២៤អ៊ីញ គឺវាតូចជាងឆ្ងាយណាស់ ព្រោះម៉ូដែលនេះគាំទ្រដល់កម្រិត 4K ឯណោះ។ ចំណែកម៉ូដែល ២៨អ៊ីញវិញបង្ហាញកម្រិត QHD។ គេហទំព័រ Windows Central បានអះអាងថា ក្រុមហ៊ុន Microsoft កំពុងធ្វើតេស្តលើកុំព្យូទ័រស៊េរីថ្មីប្រភេទ all-in-one (AIOs) ដែលទាំងម៉ាស៊ីន និងអេក្រង់នៅជាមួយគ្នា ដែលមាន ៣ទំហំផ្សេងគ្នាគឺ ២១អ៊ីញកម្រិត Full HD, ទំហំ ២៤អ៊ីញកម្រិត 4K ហើយ ជម្រើសទី៣ គឺ ២៧អ៊ីញកម្រិត 4K។

  មិនទាន់ច្បាស់នៅឡើយថា តើក្រុមហ៊ុន Microsoft ពិតជាមានគម្រោងចេញកុំព្យូទ័រ Surface ប្រភេទ AIOs ម្ដងទាំងបីទំហំនេះឬមួយយ៉ាងណា ព្រោះវាគ្រាន់តែជាដំណាក់កាលធ្វើតេស្តប៉ុណ្ណោះ ដើម្បីស្វែងរកការផ្ដល់ជូនអតិថិជនសមស្របតាមបទពិសោធន៍ល្អបំផុតនាសម័យបច្ចេកវិទ្យាជឿនលឿននេះ។ ប្រភពលើកឡើងថា Surface AIO អាចនឹងមានការឌីហ្សាញជាពិសេស រូបរាងទំនើបទាន់សម័យ (elegant) ហើយនឹងមានអ្វីថ្មីពិសេស ធ្វើឱ្យអ្នករំភើបនៅពេលបានប្រើប្រាស់កុំព្យូទ័រស៊េរីថ្មីនេះ។ គេហទំព័រ Windows Central ឱ្យដឹងថា អង្គភាពខ្លួនបានទទួលដំណឹងមកថា Surface Book ក៏នឹងត្រូវក្រុមហ៊ុន Microsoft បន្តអភិវឌ្ឍសមត្ថភាពផ្នែក hardware ផងដែរ។ Surface Book ជំនាន់ថ្មីនឹងបំពាក់ឈីប Kaby Lake របស់ក្រុមហ៊ុន Intel។ Microsoft បាននិយាយថា នឹងធ្វើឱ្យស៊េរីកុំព្យូទ័រ Surface Book កាន់តែទំនើប ទទួលស្គាល់កាន់តែច្រើនមជ្ឈដ្ឋាន៕ ប្រែសម្រួល៖ រឹទ្ធិរាជ ប្រភព៖ techspot