ឆ្លើយតបទៅនឹងរបាយការណ៍ដែលទើបចុះផ្សាយថ្មីៗនេះ ថា Note 7 មានបញ្ហាថ្ម ឥឡូវនេះ ក្រុមហ៊ុន Samsung បានចេញមុខអះអាង ទៅលើរបាយការណ៍នេះថា ពិតមែន។ ថ្មរបស់ Galaxy Note 7 មានបញ្ហា អាចរហូតដល់ផ្ទុះឆេះបាន។ យ៉ាងណា ពេលនេះ ក្រុមហ៊ុនកំពុងស៊ើបអង្កេត និងស្វែងរកដំណោះស្រាយ។ នៅខណៈពេលនេះ ក្រុមហ៊ុនបានប្រកាសប្រមូលមកវិញនូវ Galaxy Note 7 ដែលទើបចែកចាយដល់ដៃអតិថិជន ឱ្យយកមកប្ដូរថ្មី ហើយក៏ពន្យារពេលចេញលក់ Galaxy Note 7 បណ្ដោះអាសន្ន ដើម្បីជួសជុលបញ្ហាថ្មបានជោគជ័យមុនដាក់លក់លើទីផ្សារម្ដងទៀត។

នៅខណៈពេលនេះ ក្រុមហ៊ុន Samsung កំពុងប្រកាសប្រមូល Galaxy Note 7 ទូទាំងពិភពលោក។ ការផ្លាស់ប្ដូរ Galaxy Note 7 ថ្មីដល់អតិថិជន គឺធ្វើឡើងយ៉ាងឆាប់រហ័ស បន្ទាប់ពីការស្រាវជ្រាវបឋមពីពេលថ្មីៗនេះ បង្ហាញថា ថ្មរបស់ Note 7 មានបញ្ហា ឆាប់ក្ដៅ និងអាចផ្ទុះឆេះ។ ការប្រមូល និងប្ដូរជូនថ្មីដល់អតិថិជន មិនធ្វើឡើងតែចំពោះ Note 7 មានបញ្ហានោះទេ តែគឺធ្វើឡើងទៅលើអតិថិជនទាំងអស់ដែលបានជាវយកទៅប្រើ ទាំងមានបញ្ហា និងមិនទាន់ជួបករណីដូចគ្នានេះ។ ក្រុមហ៊ុនថែមទាំងផ្អាកការចែកចាយលក់បណ្ដោះអាសន្ន ដើម្បីកែលំអបញ្ហាថ្ម Note 7 ជាមុនសិន។ ប្រធានផ្នែកពាណិជ្ជកម្មទូរស័ព្ទរបស់ Samsung លោក Koh Dong-jin បានលើកឡើងថា ចំនួន Note 7 ដែលមានបញ្ហាថ្ម ផ្ទុះឆេះ មានតិចតួចណាស់ ពោលគឺ ត្រឹមតែ ២៤គ្រឿង ក្នុងចំណោម ១លានគ្រឿងប៉ុណ្ណោះ។ សូមបញ្ជាក់ថា ថ្មនៅលើទូរស័ព្ទ Note 7 បច្ចុប្បន្នគឺត្រូវបានឌីហ្សាញផ្ទាល់ដៃពីក្រុមហ៊ុន Samsung ប៉ុន្តែការផលិត ឬផ្គុំដំឡើងគឺក្រុមហ៊ុន បានប្រើដៃគូសហការផ្សេងៗ (outsource) ហើយរោងចក្រមួយក្នុងចំណោមដៃគូសហការនោះ បានបង្កើតកំហុសឆ្គងលើផលិតកម្មថ្មរបស់ Note 7។ វាជារឿងល្អ ដែល Samsung គិតគូរពីសុវត្ថិភាពអតិថិជន ដោយប្រញាប់ប្រញាល់ប្រមូល Note 7 ចូលរោងចក្រវិញ ដើម្បីស្រាវជ្រាវ និងកំណត់ច្បាស់លាស់អំពីគុណភាពថ្ម ទើបប្ដូរ ឬផ្ដល់ឱ្យអតិថិជនប្រើប្រាស់។ បច្ចុប្បន្នក្រុមហ៊ុនកំពុងដំណើរការកម្មវិធី ប្ដូរ Note 7 ថ្មីដល់អតិថិជននៅលើទីផ្សារអាមេរិក។ យ៉ាងណា ពេលនេះ ក្រុមហ៊ុនបានពន្យារពេលចែកចាយលក់ Galaxy Note 7 បណ្ដោះអាសន្ន ដោយរងចាំការធ្វើតេស្ត និងកំណត់ឃើញថា ពិតជាមានគុណភាព និងសុវត្ថិភាពដល់អតិថិជន ទើបក្រុមហ៊ុនចែកចាយសារជាថ្មី៕