ក្រុមហ៊ុន Apple នឹងប្រកាសចេញទូរស័ព្ទថ្មី iPhone 7 និង 7 Plus របស់ខ្លួន នៅក្នុងព្រឹត្តិការណ៍ថ្ងៃទី៧ កញ្ញា ម៉ោង ១០ព្រឹក នៅទីក្រុងសាន់ហ្រ្វាន់ស៊ីស្កូ ដែលត្រូវនឹងម៉ោង ១២ កណ្ដាលអធ្រាត្រយប់នេះ ឆ្លងចូលថ្ងៃព្រហស្បតិ៍ ម៉ោងនៅប្រទេសកម្ពុជា។ នៅសល់តែជាង ១០ម៉ោងទៀតប៉ុណ្ណោះ iPhone 7 ទាំងពីរ នឹងបង្ហាញខ្លួនផ្លូវការ ប៉ុន្តែពេលនេះ ប្រអប់ iPhone ស៊េរីថ្មីនេះ បានលេចចេញនៅលើបណ្ដាញអ៊ីនធឺណិតមុនបាត់ទៅហើយ។ iPhone ថ្មីនឹងមានការឌីហ្សាញថ្មីមួយចំនួន ក្នុងនោះ ខ្សែអង់តែនពណ៌ស នឹងត្រូវផ្លាស់ប្ដូរទីតាំងទៅផ្នែកកំពូលខាងលើ ដែលអាចមានរូបរាងដូចខាងលើ។

ក្រុមហ៊ុន Apple ក៏នឹងដករន្ធកាស 3.5mm ចេញពីទូរស័ព្ទ iPhone 7 ដោយជំនួសមកវិញនូវរន្ធ Lightning អាចប្រើសម្រាប់សាកថ្ម និងដោតកាសស៊េរីថ្មីបានងាយស្រួល។ iPhone ជំនាន់ទី១០ ទាំងពីរម៉ូដែល នឹងមានការកែលំអលក្ខណៈ សម្បត្តិមួយចំនួនល្អជាង iPhone បច្ចុប្បន្ន ដែលរួមមាន៖ បំពាក់អង្គប្រតិបត្តិថ្មី Apple A10, RAM 3GB ហើយនិងដំណើរការដោយប្រព័ន្ធប្រតិបត្តិការ iOS 10។

កាមេរ៉ានៅលើ iPhone 7/ 7 Plus នឹងត្រូវអភិវឌ្ឍទំនើបជាងមុន ដោយ iPhone 7 នឹងមានទំហំ 12MP អមដោយមុខងារ OIS ហើយ iPhone 7 Plus នឹងមានកាមេរ៉ាចំនួនពីរគ្រាប់ ទំហំ 12MP។ យើងនឹងដឹងលំអិតនូវលក្ខណៈសម្បត្តិនៅលើ iPhone ថ្មីរបស់ Apple ក្នុងពេលដ៏ឆាប់ នៅរយៈពេលតែប៉ុន្មានទៀតប៉ុណ្ណោះ។ រីឯនាឡិកា Apple Watch 2 ក៏នឹងត្រូវសម្ពោធផ្លូវការក្នុងព្រឹត្តិការណ៍ម៉ោង ១២យប់នេះផងដែរ៕