យោងសេចក្ដីរាយការណ៍នៅលើសារព័ត៌មាន Android News បានឱ្យដឹងថា ក្រុមហ៊ុន Nokia កំពុងសំងំផលិតចេញថេប្លេតថ្មីរបស់ខ្លួនដើរដោយប្រព័ន្ធប្រតិបត្តិការ Android ដែលអាចសម្ពោធចេញនៅចុងឆ្នាំ២០១៦ នេះតែម្ដង។ ទន្ទឹមនោះ ក៏មានការលេចរូបលក្ខណៈសម្បត្តិក្រោមការធ្វើ benchmarks លើថេប្លេតដែលរំពឹងនឹងមានឈ្មោះ Nokia D1C នេះផងដែរ។
តាមការធ្វើតេស្តលក្ខណៈសម្បត្តិ Hardware ក្រោមទម្រង់ Benchmarks នេះ បង្ហាញឱ្យឃើញថា Nokia D1C នឹងមានអេក្រង់ទំហំ ១៣,៨អ៊ីញកម្រិត Full HD អមដោយ resolution ទំហំ 1920 x 1080px។ លក្ខណៈ សម្បត្តិផ្សេងទៀតនៅលើ Android Tablet នេះ គឺបំពាក់ដោយបន្ទះឈីប Snapdragon 430 របស់ Qualcomm ប្រភេទ Ocat-core ល្បឿន 1.4GHz ក្រាហ្វិក Adrena 305, RAM 3GB និងមានមេម៉ូរីម៉ាស៊ីន 16GB។
Nokia D1C នឹងបំពាក់ដោយកាមេរ៉ាសមត្ថភាពយ៉ាងខ្ពស់ ដែលខាងមុខមានទំហំ 8MP ហើយកាមេរ៉ាក្រោយទំហំ 16MP។ ថេប្លេត Nokia ថ្មីនេះ នឹងមានរន្ធដោតស៊ីមកាតប្រើបាន។ រង់ចាំមើលទាំងអស់គ្នា តើថេប្លេតថ្មី Nokia នឹងវាយលុកទីផ្សារថេប្លេតបានកម្រិតណា នៅពេលចេញលក់លើទីផ្សារឆាប់ៗខាងមុខនោះ?
