យោងតាមគេហទំព័រដែលតាមដានយ៉ាងជិតស្និតនឹងព័ត៌មានទាំងឡាយរបស់ Apple គឺ MacRumors ថ្ងៃនេះ បានអះអាងថា ក្រុមហ៊ុនអាមេរិកនេះ បានរៀបចំព្រឹត្តិការណ៍ Apple Macs នៅខែតុលា ថ្ងៃទី២៧ ខាងមុខ ដើម្បីសម្ពោធផ្លូវការនូវកុំព្យូទ័រ MacBook Pro ជំនាន់ថ្មី។
សាធារណជនបានរំពឹងទុកថា ក្រុមហ៊ុន Apple នឹងប្រកាសចេញកុំព្យូទ័រ MacBook Pro ស៊េរីថ្មីម្ដង ២ម៉ូដែលគឺខុសគ្នាត្រង់ទំហំអេក្រង់ ដែលមួយមានទំហំ ១៣អ៊ីញ និងមួយម៉ូដែលទៀតទំហំ ១៥អ៊ីញ។ កុំព្យូទ័រ MacBook Pro នឹងបំពាក់ដោយឈីបអង្គប្រតិបត្តិជំនាន់ចុងក្រោយ រំពឹងនឹងភ្ជាប់របារ OLED នៅផ្នែកខាងលើ ដែលអាចប្រើជំនួសចង្កឹះមុខងារ (function keys)។
ទោះជាយ៉ាងណា មិនច្បាស់នោះឡើយថា តើក្រុមហ៊ុន Apple នឹងសម្ពោធកុំព្យូទ័រ iMacs ដំណាលគ្នានៅក្នុងព្រឹត្តិការណ៍ថ្ងៃទី២៧ នេះដែរឬអត់ឡើយ។ រង់ចាំអ៊ុមមើលទាំងអស់គ្នាថាតើ MacBook Pro ថ្មីនឹងពិសេសជាងមុនកម្រិតណា? តើនៅមានសមិទ្ធផលអ្វីខ្លះទៀតដែល Apple ត្រៀមបង្អួត?
