ថ្មីៗនេះ ក្រុមហ៊ុន Microsoft បានសម្ពោធកុំព្យូទ័រដំបូងជំនាន់ទី២ របស់ខ្លួនជាបន្ត ក្រោមសែស្រឡាយ Surface Book ដោយគ្រាន់តែបន្ថែមឈ្មោះ i7 ពីខាងក្រោយប៉ុណ្ណោះ។ កុំព្យូទ័រ Surface Book i7 ត្រូវបានបំពាក់បន្ទះឈីប Intel Core i7 ជំនាន់ចុងក្រោយ ហើយមាន RAM 8GB/16GB និងមានអង្គផ្ទុកទិន្នន័យចាប់ពី 256GB ដល់ 1TB ។ https://youtu.be/A1OsmndtIrY កុំព្យូទ័រ Surface Book ជំនាន់ទី២ ត្រូវបានសម្រិតសម្រាំងអមមកជាមួយសមត្ថភាពខ្ពស់ និងមានថ្មកាន់បានរយៈពេលយូររហូតដល់ ១៦ម៉ោង និងមានការរចនារូបរាងពិសេសគួរឱ្យសាធារណជនទាក់ទាញមិនតិចទេ។ ចំពោះក្រាហ្វិករបស់វាវិញ គឺមានសមត្ថភាពជាងមុន ២ដងប្រៀបធៀបនឹង Surface Book ជំនាន់ទី១។ អាចនិយាយបានថា ពុំមាន Laptop ណាពិសេសដូច Surface Book i7 ដោយសារវា ត្រូវបានច្របាច់បញ្ចូល ថ្មកាន់បានយូរ សមត្ថភាពខ្លាំង កម្រិតភិចហ្សែលខ្ពស់ និងមានទម្ងន់ស្រាលថែមទៀត។

Surface Book i7 មានអេក្រង់ទំហំ ១៣,៥អ៊ីញកម្រិត resolution រហូតដល់ 3000x2000px ហើយបំពាក់ដោយក្រាហ្វិក NVIDIA GeForce GTX 965M។ ចំពោះតម្លៃរបស់វាវិញ គឺចាប់ពី ២៣៩៩ដុល្លារ រហូតដល់ ៣២៩៩ដុល្លារអាមេរិក ដែលត្រូវបានដាក់ឱ្យកុម្ម៉ង់ទិញចាប់ពីថ្ងៃនេះតទៅហើយ៕