បន្ទាប់ពីបានពន្យារពេលចេញលក់ ដោយសារបញ្ហាចង្វាក់ផលិតកម្មកន្លងមក ពេលនេះ ក្រុមហ៊ុន Apple បានចេញលក់កាសទំនើបឥតខ្សែរបស់ខ្លួនហើយ។ AirPod គឺជាកាសឥតខ្សែទំនើប ប្រើជាគូ មានក្បាលកាសដូចជាកាស Earpod (កាសខ្សែ) នៅលើ iPhone/iPad បច្ចុប្បន្នដែរ។ តម្លៃកាស Bluetooth ដំបូងរបស់ Apple នេះ គឺប្រហែល ១៥៩ដុល្លារ។
វាមានរយៈពេលជាង ៣ខែមកហើយ បន្ទាប់ពីក្រុមហ៊ុនបានប្រកាសចេញកាស AirPod អត់ប្រើខ្សែ សម្រាប់ប្រើជាគូជា iPhone/iPad ។ ពេលនេះ Apple បានបញ្ចេញលក់កាសទំនើបរបស់ខ្លួននៅលើទីផ្សារហើយ។ អ្នកទិញកាស AirPod តាមហាងលក់អនឡាញជុំវិញពិភពលោកបាន ដែលវានឹងត្រូវបានដឹកជញ្ជូននៅរយៈពេលពី ១សប្ដាហ៍ ទៅ ៤សប្ដាហ៍បន្ទាប់ពីបញ្ជាទិញ។ សម្រាប់ទីផ្សារអង់គ្លេស កាសនេះនឹងចរាចរតាមបណ្ដាហាងនានា ចាប់ពីថ្ងៃទី១៩ ធ្នូនេះ ខណៈទីផ្សារអាមេរិកគឺត្រូវរង់ចាំ ៤សប្ដាហ៍ទៀត។
AirPods គឺជាកាសមានតម្លៃថ្លៃ ហើយរូបរាងប្លែកពីកាស Bluetooth នានានៅលើទីផ្សារ ព្រោះវាត្រូវបានផលិតក្នុងទម្រង់ដូចជាកាសខ្សែដែរ គ្រាន់តែប្រើបច្ចេកវិទ្យា wireless ប៉ុណ្ណោះ។ ដូច្នេះ សម្រាប់អតិថិជនធម្មតា ប្រហែលមិនសូវជាចាប់អារម្មណ៍ទៅលើកាសឥតខ្សែនេះឡើយ ព្រោះនៅពេលទិញ iPhone ក្រុមហ៊ុនមានថែមជូនកាសខ្សែរួចស្រេចទៅហើយ៕
