វា​ពិត​ជា​មិន​គួរ​ឱ្យ​ជឿ​ដែល​ម៉ូតូ​កង់​ពីរ មិន​វ៉ៃ​ជន្ទល់ ហើយ​គ្មាន​មនុស្ស​ទប់ តែ​មិន​ដួល​នោះ។ ប៉ុន្តែ​ពេល​នេះ ក្រុមហ៊ុន Honda បាន​ធ្វើ​ឱ្យ​វា​ពិត​ជា​ទៅ​រួច​បាន។ ក្រុមហ៊ុន​ឯកទេស​ផលិត​យានយន្ត​ជប៉ុន​នេះ ទើប​ដាក់​បង្ហាញ​សមិទ្ធផល​ថ្មី​សន្លាង និង​អស្ចារ្យ​ដែល​ជា​ម៉ូតូ​ទំនើប មិន​ចេះ​ដួល បើ​ទោះបី​វា​មាន​កង់​តែ​២ ដូច​ម៉ូតូ​ទូទៅ​ក៏​ដោយ។ https://youtu.be/Patgb8ddNgc ក្រុមហ៊ុន​បាន​អភិវឌ្ឍ និង​បំពាក់​បច្ចេកវិទ្យា self-balancing នៅ​លើ​ម៉ូតូ​ស៊េរី​ថ្មី​របស់​ខ្លួន។ Honda បាន​គូស​បញ្ជាក់​ថា ខ្លួន​ផលិត​ម៉ូតូ​ស៊េរី​ថ្មី​នេះ ដើម្បី​កាត់បន្ថយ​ការ​ជិះ​ម៉ូតូ​ដួល ម្យ៉ាង​ក៏​អាច​បង្កើន​សុវត្ថិភាព​ល្អ​ជាង​មុន​ផង​ដែរ។ បន្ទាប់​ពី​បាន​ធ្វើតេស្ត សង្កេត​ឃើញ​ថា ម៉ូតូ​នេះ​ពិត​ជា​មាន​សមត្ថភាព​មិន​គួរ​ឱ្យ​ជឿ ពោល​ទោះបី​បើក​ក្នុង​ល្បឿន​យឺត​យ៉ាងណា​ក៏​ដោយ ក៏​វា​មិន​ដួល​ឡើយ។ ទោះ​ជា​យ៉ាងណា ពេល​នេះ​ក្រុមហ៊ុន Honda មិន​បាន​បញ្ជាក់​ថា នៅ​ពេល​ណា​ទើប​រុញ​គំរូ​ម៉ូតូ​ច្នៃប្រឌិត​ខ្ពស់​របស់​ខ្លួន​នៅ​ចូល​ចង្វាក់​ផលិតកម្ម ដើម្បី​ដាក់​លក់​លើ​ទីផ្សារ​នៅ​ឡើយ ខណៈ​ដែល​ពេល​នេះ ក្រុមហ៊ុន​កំពុង​តាំង​បង្ហាញ​នៅ​ក្នុង​ពិព័រណ៍​អេឡិចត្រូនិក CES 2017 នៅ​ទីក្រុង Las Vegas នៃ​សហរដ្ឋ​អាមេរិក៕