ក្រុមហ៊ុន Xiaomi ដែលទើបទទួលបានការចាប់អារម្មណ៍ពីសាធារណជនលើពិភពលោក ក្រោមគំនិតបង្កើតថ្មី នូវស្មាតហ្វូនរូបរាងទំនើប គែមអេក្រង់មហាស្ដើង Mi Mix។ ចំណែកព័ត៌មានថ្ងៃនេះ ឱ្យដឹងនូវវត្តមានស្មាតហ្វូន Xiaomi ថ្មីទៀតហើយ ដែលមានម៉ូដែល Mix Evo។ អ្វីដែលពិសេសនោះ Mix Evo នឹងបំពាក់ដោយឈីបជំនាន់ចុងក្រោយ Snapdragon 835 របស់ក្រុមហ៊ុន Qualcomm។
Xiaomi Mix Evo ថែមទាំងនឹងមាន RAM ទំហំ 4GB ដំណើរការដោយប្រព័ន្ធប្រតិបត្តិការ Android 6.0.1 Marshmallow។ ទាំងនេះ គឺជាលក្ខណៈសម្បត្តិដែលគេអាចដឹងថា នឹងមាននៅលើ Mix Evo យ៉ាងណា ចំពោះកាមេរ៉ា និងទំហំអង្គចងចាំរបស់វា ពុំទាន់មានព័ត៌មានអះអាងនៅឡើយ។ បើតាមផ្ទាំងលទ្ធផលក្រោយធ្វើ benchmark ដោយ Geekbench បង្ហាញថា ទូរស័ព្ទនេះ មានប្រព័ន្ធដំណើរការ Android 6.0.1, ម៉ូដែល Xiaomi Mix Evo, អង្គប្រតិបត្តិ ARMv8 @1.90Hz (8-core), RAM ទំហំ 3581MB។
នៅពេលមានដំណឹងទាក់ទងលក្ខណៈសម្បត្តិនៅលើ Xiaomi Mix Evo នេះ យើងនឹងចុះផ្សាយ ជូនប្រិយមិត្តបានជ្រាបបន្តទៀត។ តើរូបរាងស្មាតហ្វូននេះ ពិសេសយ៉ាងណា?
