ការ​ត្រឡប់​មក​វិញ​របស់ Nokia នៅ​លើ​ទីផ្សារ​ស្មាតហ្វូន ហាក់​មាន​ស្ទុះ​បោះពួយ​យ៉ាង​លឿន ជាមួយ​ការ​តេស្ត​ប្រជាប្រិយភាព​របស់​ខ្លួន ដោយ​បាន​បញ្ចេញ​ទូរស័ព្ទ​ធុន​មធ្យម Nokia 6។ ១លាន​គ្រឿង​ជា​តួលេខ​កុម្ម៉ង់​ទុក Nokia 6 ដែល​ជា​បរិមាណ​ខ្ពស់​មួយ​សម្រាប់​ការ​ទើប​បង្ហាញ​ផ្លូវការ​ទូរស័ព្ទ Android ដំបូង​នេះ។ ចំណែក​ពេល​នេះ សាខា Nokia ប្រចាំ​ប្រទេស​ចិន​បាន អះអាង​មក​ថា ក្រុមហ៊ុន​ត្រៀម​នឹង​បញ្ចេញ​ស្មាតហ្វូន​កំពូល​ដំបូង​ដើរ​ដោយ Android ​អម​ជាមួយ​ឈីប​សមត្ថភាព​ខ្ពស់​ជំនាន់​ចុងក្រោយ​គឺ Snapdragon 835។ ជា​ការ​ពិត គ្រាន់តែ​ឃើញ​បន្ទះ​ឈីប​ដែល​ក្រុមហ៊ុន​ទូរស័ព្ទ​ហ្វាំងឡង់​នេះ អះអាង​ក៏​ដឹង​ថា វា​នឹង​ជា​ស្មាតហ្វូន​ស៊េរី​ខ្ពស់​ដែរ។ ការ​អះអាង​នេះ ធ្វើ​ឡើង​ដោយ​ក្រុមហ៊ុន Nokia China ​សរសេរ​នៅ​លើ​បណ្ដាញ​សង្គម Weibo។ ក្រុមហ៊ុន​បាន​លើកឡើង​ថា បច្ចុប្បន្ន​កំពុង​ធ្វើការ​លើ​គម្រោង​ផលិត​ស្មាតហ្វូន​ថ្មី ដែល​បំពាក់​ឈីប Snapdragon 835 ​ពី​ក្រុមហ៊ុន Qualcomm។ យោងតាម​របាយការណ៍​ថ្មី​មួយ​ឱ្យ​ដឹង​ថា វា​អាច​ត្រូវ​ការ​ចន្លោះ​ពេល​មួយ​សម្រាប់​ការ​រួចរាល់​បង្ហាញ​ចេញ​កំពូល​ស្មាតហ្វូន Nokia ដូច្នេះ​ប្រហែល​សាធារណជន​នឹង​មិន​ទាន់​ឃើញ​វត្តមាន​ទូរស័ព្ទ​នេះ នៅ​ក្នុង​សមាជ MWC 2017 ខែ​ក្រោយ​នោះ​ឡើយ។ ក្រុមហ៊ុន Nokia កំពុង​ត្រូវ​សាធារណជន​រំពឹង​ថា នឹង​សម្ពោធ​ស្មាតហ្វូន Android ​ថ្មីៗ នៅ​ក្នុង​ព្រឹត្តិការណ៍ MWC 2017 ខែ​ក្រោយ​នេះ ហើយ​ Nokia 6 ម៉ូដែល​អន្តរជាតិ (International Version) ​ក៏​នឹង​ចាប់​បង្ហាញ​ខ្លួន​សម្រាប់​ទីផ្សារ​ពិភពលោក ក្រៅពី​ចិន​ផង​ដែរ៕