តើលុយពិតជាអាចទិញសុភមង្គលឲ្យអ្នកបានឬ?
ហេតុអ្វីអ្នកមានប្រាក់ចាយមិនខ្វះមួយចំនួននៅតែមិនទទួលបាននូវសេចក្ដីសុខក្នុងជីវិត ទន្ទឹមនឹងមនុស្សជាច្រើនមានទស្សនយល់ឃើញដូចៗគ្នាថា ប្រាក់អាចទិញសុភមង្គលរបស់មនុស្សបាន ? និងអ្វីដែលកាន់តែជាភាពភ្ញាក់ផ្អើលទៅទៀតនោះ គឺអ្នករស់នៅក្នុងសភាពក្រខ្សត់យ៉ាងលំបាកលំបិនមួយចំនួន បែរជាមានសុភមង្គលជាមួយនឹងរបស់បន្តិចបន្តួចនៅក្នុងជីវិតរបស់ពួកគេវិញនោះ ?
ទាំងនេះគឺជាសំណួរដែលគួរឲ្យគិតវិភាគពិចារណា និងសង្កេតឲ្យបានស៊ីជម្រៅបន្ថែម។ តើអ្នកយល់ឃើញបែបណាវិញ បើសិនជាមានអ្នកធ្វើការសិក្សាស្រាវជ្រាវទៅលើប្រធានបទនេះយ៉ាងដិតដល់ បានអះអាងថាចំនួនទឹកប្រាក់ដែលអ្នកមាន មិនមែនជាកត្តាកំណត់ទៅលើសេចក្ដីសុខរបស់អ្នកនោះឡើយ តែផ្ទុយទៅវិញ វាគឺជារបៀបដែលអ្នកប្រើប្រាស់ប្រាក់របស់អ្នកទៅវិញទេទើបជាកត្តាកំណត់លើសេចក្ដីសុខរបស់អ្នកពិតប្រាកដ។
មនុស្សជាច្រើន តែងមានទស្សនយល់ឃើញចំពោះការចាយវាយជាប្រចាំថ្ងៃរបស់ពួកគេថា ការចំណាយប្រាក់លើសម្ភារៈប្រើប្រាស់ ផ្ដល់នូវសេចក្ដីសុខដល់ពួកគេជាងការចំណាយប្រាក់លើបទពិសោធន៍ជីវិត។ ហេតុអ្វីពួកគេយល់ឃើញបែបនេះ ? ហេតុផលស្ថិតនៅត្រង់ថា សម្ភារៈប្រើប្រាស់ ធ្វើឲ្យពួកគេមានសេចក្ដីសុខជាមួយនឹងវាបានយូរជាងបទពិសោធន៍ជីវិតដូចជាការដើរលេងកម្សាន្តជាដើម។ ម្យ៉ាងទៀត សម្ភារៈប្រើប្រាស់គឺជាប្រភេទនៃការចំណាយមួយបែបដែលក្រោយពីនោះអ្នកអាចចាប់កាន់វា និងប្រើប្រាស់វាបានមិនដូចជាដំណើរកម្សាន្តនោះឡើយ។
ពិតប្រាកដណាស់ថា ការយល់ឃើញបែបនេះ បើបកស្រាយតាមសភាពជាក់ស្ដែង វាជាគំនិតដែលមានភាពសមហេតុសមផលមួយ តែបើនិយាយចំពោះចិត្តសាស្ត្រវិញ វាមិនមែនបែបនេះនោះទេ សម្ភារៈប្រើប្រាស់មិនបានធ្វើឲ្យមនុស្សមានសេចក្ដីសុខបានយូរអង្វែងឡើយ។ ហេតុអ្វីអ្នកស្រាវជ្រាវទាំងឡាយ ហ៊ានអះអាងផ្ទុយពីការយល់ឃើញរបស់មនុស្សភាគច្រើនបែបនេះ ?
ហេតុផលទី១ បទពិសោធន៍ជីវិតបានផ្ដល់ឲ្យយើងនូវអារម្មណ៍នៃការភ្ជាប់ទំនាក់ទំនងគ្នា ព្រោះបើនិយាយចំពោះការដើរកម្សាន្ត វាគឺជាបទពិសោធន៍ជីវិតមួយបែប ដែលយើងបានចែករំលែកជាមួយអ្នកដទៃ បើទោះជាពួកគេមិនបានរួមដំណើរជាមួយយើងក្ដី។ មិនតែប៉ុណ្ណោះ ការចំណាយប្រាក់ទៅលើបទពិសោធន៍ជីវិត ក៏បាននាំឲ្យយើងនូវអារម្មណ៍ដែលបញ្ជាក់ពីអត្តសញ្ញាណរបស់ខ្លួនដែរ ត្រង់ចំណុចនេះ អ្នកអាចសាកនឹកគិតទៅដល់បទពិសោធន៍ពីការឡើងភ្នំមកជម្រះនូវចម្ងល់ក៏បាន។
ហេតុផលទី២ទាក់ទងទៅនឹងចិត្តសាស្ត្រធម្មជាតិរបស់មនុស្ស។ ទោះជាដឹងខ្លួនឬមិនដឹងខ្លួនក៏ដោយ មនុស្សយើងតែងធ្វើការប្រៀបធៀបអ្វីដែលខ្លួនមានទៅនឹងអ្វីដែលអ្នកដទៃមាន។ មិនចាំបាច់ឆ្ងល់នោះទេ នៅពេលអ្នកកំពុងមានសម្ភារៈទំនើប និងតម្លៃថ្លៃមួយនៅក្នុងដៃ ដែលជារបស់ជាទីពេញចិត្តរបស់អ្នក ស្រាប់តែមួយរំពេចនោះ មាននរណាម្នាក់ បង្ហាញអ្នកនូវសម្ភារៈរបស់ខ្លួន ដែលមានសភាពល្អប្រសើរជាងអ្នក វាប្រាកដជាប៉ះពាល់ដល់អារម្មណ៍របស់អ្នក បើមិនច្រើនក៏តិចដែរ។
ផ្ទុយទៅវិញ ចំពោះបទពិសោធន៍ជីវិត បើទោះជាអ្នកដទៃទទួលបាននូវដំណើរកម្សាន្តដែលមានភាពសប្បាយរីករាយ ឡូយឆាយជាងអ្នកក្ដី ក៏បទពិសោធន៍ដែលមានលក្ខណៈជាភាពពិសេសរបស់អ្នក ដែលអ្នកទទួលដឹងបានតាមអារម្មណ៍ពិតៗរបស់អ្នក នឹងធ្វើឲ្យអ្នកនៅតែមានសេចក្ដីសុខជាមួយនឹងអ្វីដែលខ្លួនមានដដែល។ ហេតុផលទី៣ ថ្វីដ្បិតតែភាពអត់ធ្មត់ចំពោះការរង់ចាំរបស់មនុស្សមានដែនកំណត់ក៏ពិតមែន ប៉ុន្តែមនុស្សយើងភាគច្រើនតែងខ្វះការអត់ធ្មត់រង់ចាំទទួលបាននូវសម្ភារៈប្រើប្រាស់មកធ្វើជាកម្មសិទ្ធិរបស់ខ្លួន ស្របពេលដែលការរង់ចាំទទួលបាននូវបទពិសោធន៍ជីវិត ពោរពេញទៅដោយក្ដីរំភើបសប្បាយរីករាយជាងទៅវិញ។ ហេតុផលចុងក្រោយ គឺជាកិលេសតណ្ហារបស់មនុស្ស ជាការចង់បានមិនចេះស្កប់ស្កល់នៃសារជាតិរបស់មនុស្ស។ មនុស្សយើងបើទោះជារកប្រាក់ចំណូលបានច្រើនជាងមុនក៏ដោយ ក៏ធម្មជាតិរបស់មនុស្សគឺឆាប់បន្សាំខ្លួនទៅនឹងសភាពបច្ចុប្បន្នរបស់ខ្លួនបានយ៉ាងរហ័ស។ ហេតុនេះ នៅពេលពួកគេបន្សាំខ្លួននឹងប្រាក់ចំណូលដែលមានក្នុងពេលបច្ចុប្បន្ន៕
