ក្រុមហ៊ុន​ផ្ដល់​សេវាកម្ម​ដឹក​ជញ្ជូន​ទូទាំង​ពិភពលោក​របស់​អាមេរិក Uber ថ្មីៗ​នេះ បាន​ប្រកាស​អំពី​គម្រោង​របស់​ខ្លួន​ គឺ​នឹង​សហការ​ជាមួយ​ក្រុមហ៊ុន​រថយន្ត​ខ្នាត​យក្ស​របស់​អាល្លឺម៉ង់ Daimler AG ដើម្បី​អភិវឌ្ឍ​រថយន្ត​បើកបរ​ស្វ័យប្រវត្តិ។ Daimler AG គឺ​ជា​ក្រុមហ៊ុន​រថយន្ត​ដ៏​ធំ​មួយ​នៅ​អាល្លឺម៉ង់ ជា​ម្ចាស់​ក្រុមហ៊ុន​រថយន្ត​ម៉ាក​ល្បី​មួយ​ចំនួន​ទៀត ដែល​រួម​ទាំង Mercedes-Benz ផង​ដែរ។ ការ​រួមដៃ​គ្នា​នេះ នឹង​លេច​ចេញ​នូវ​បច្ចេកវិទ្យា​រថយន្ត self-driving ដ៏​ទំនើប ដែល Daimler នឹង​ជា​អ្នក​ផលិត ហើយ Uber នឹង​ទទួល​បន្ទុក​លើ​ផ្នែក​បណ្ដាញ ride-hailing network។

Uber មិន​មាន​បទពិសោធន៍​ក្នុង​ការ​ផលិត​រថយន្ត​ដោយ​ផ្ទាល់​នោះ​ទេ ហើយ​ការ​ផលិត​រថយន្ត​ជា​រឿង​ក៏​មិន​មែន​ងាយស្រួល​ដែរ។ ដូច្នេះ​ក្រុមហ៊ុន​រថយន្ត​ដូច​ជា Dailmer នេះ គឺ​ជា​ដៃគូ​សហការ​ដ៏​ល្អ​ដើម្បី​បំពេញ​យុទ្ធសាស្ត្រ​របស់​ពួក​យើង។ នេះ​បើ​តាម​ការ​លើកឡើង​របស់​នាយក​ប្រតិបត្តិ Uber លោក Travis Kalanic ​ដែល​បាន​បង្ហោះ​នៅ​លើ Bock កាលពី​ម្សិលមិញ។ កិច្ចសហការ​គ្នា​នេះ នឹង​លេច​ចេញ​នូវ​រថយន្ត Self-driving ទំនើប​ ដូច​ជា​ស៊េរី Mercedes-Benz sedans ​ជាដើម ​ដែល​ជា​ម្ចាស់ និង​ប្រតិបត្តិ​ដោយ Daimler ប៉ុន្តែ​នឹង​ប្រើប្រាស់​បច្ចេកវិទ្យា​បណ្ដាញ​ក្នុង​ការ រើស​អ្នក​ដំណើរ និង​ដាក់​អ្នក​ដំណើរ​ចុះ របស់​ក្រុមហ៊ុន Uber៕ ​ប្រែ​សម្រួល៖ រឹទ្ធិរាជ ប្រភព៖ theverge