ក្រុមហ៊ុនឯកទេសខាងផលិតកាមេរ៉ាថតសកម្មភាព របស់អាមេរិក GoPro បច្ចុប្បន្នកំពុងមានឈ្មោះបោះសំឡេងតាមរយៈផលិតផល action camera ត្រកូល GoPro Hero របស់ខ្លួន ជាក់ស្ដែងជំនាន់ចុងក្រោយគឺ Hero 5 Black ដែលបានបញ្ចេញលក់លើទីផ្សាររួចមកហើយកាលពីឆ្នាំ២០១៦ កន្លងទៅ។ បើតាមរបាយការណ៍ថ្មីនេះ អះអាងថា នឹងមាន GoPro Hero 6 ទៀតក្នុងឆ្នាណំ២០១៧ នេះ។
GoPro ហាក់លូកកាន់តែជ្រៅជាមួយឧស្សាហកម្មកាមេរ៉ាថតសកម្មភាព ដោយបន្តផលិត Hero ពីមួយជំនាន់ទៅមួយជំនាន់កាន់តែទំនើប បច្ចេកវិទ្យាខ្ពស់ជាងមុន ជាក់ស្ដែង Hero 5 Black ត្រូវបានបំពាក់មុខងារមានអត្ថប្រយោជន៍ដូចជា៖ ធន់នឹងការប៉ះទឹក ជម្រៅ ១០ម៉ែត្រ ដោយមិនត្រូវការប្រើស្រោម, មានប្រព័ន្ធ GPS, បំពាក់អេក្រង់ touchscreen ទំហំ ២អ៊ីញ ក្រៅពីនេះ គឺទៅលើសមត្ថភាពថតវីដេអូតែម្ដង ដែលវាអាចថត 4K/30fps បាន និងមាន dual microphone, Electronic Image Stabilization, RAW photography and Wide Dynamic Rang។ លើសពីនេះ GoPro ថែមទាំងបញ្ចេញលក់ Drone ដំបូង Karma ថែមទៀតកាលពីខែកញ្ញា ឆ្នាំ២០១៦។
យ៉ាងណា របាយការណ៍សារពើពន្ធចុងក្រោយរបស់ GoPro ឃើញថា ក្រុមហ៊ុនបាត់ប្រាក់ចំនេញប្រមាណ ១១៦លានដុល្លារ។ នាយកប្រតិបត្តិ GoPro លោក Nicholas Woodman បានអះអាងថា នឹងមានម៉ូដែល GoPro ជំនាន់ថ្មី Hero 6 បង្ហាញខ្លួនពេលណាមួយក្នុងឆ្នាំ២០១៧ នេះ ដែលនឹងជួយស្ដារប្រាក់ចំណូលរបស់ខ្លួន។
បើតាមទម្លាប់ GoPro គឺក្រុមហ៊ុនតែងផលិតចេញកាមេរ៉ាស៊េរីថ្មី បើមិន មួយឆ្នាំម្ដង យ៉ាងហោច ២ឆ្នាំ ចេញមួយស៊េរីថ្មីទៀត។ GoPro នឹងធ្វើការកែលំអចំណុចខ្សោយដ្រូន “Karma” ហើយដាក់លក់លើទីផ្សារម្ដងទៀតក្នុងឆ្នាំ២០១៧ នេះ៕
