របាយការណ៍ទើបលើកឡើងមិនយូរប៉ុន្មាន ពេលនេះក្រុមហ៊ុន Apple បានចេញមុខអះអាងជាសាធារណៈហើយថា ក្រុមហ៊ុនពិតជានឹងបង្កើតសង្វាក់ផលិតកម្មទូរស័ព្ទ iPhone ក្នុងប្រទេសឥណ្ឌាពិតមែន។ ក្រុមហ៊ុនអាមេរិកនេះ នឹងចាប់ផ្ដើម ផលិត iPhone នៅឥណ្ឌាដែលជាទីផ្សារទូរស័ព្ទធំលើលោក ពីចុងខែមេសាខាងមុខនេះ។
ក្រុមហ៊ុន Apple បានសហការជាមួយក្រុមហ៊ុន Wistron Corp របស់តៃវ៉ាន់ ដែលនឹងមានបន្ទុកកនុងការផលិតឧបករណ៍សម្រាប់ Apple នៅក្នុងរដ្ឋធានីនៃរដ្ឋឥណ្ឌា Karnataka។ ក្រុមហ៊ុន Apple សម្លឹងឃើញឥណ្ឌាជាទីផ្សារស្មាតហ្វូនដ៏មានសក្ដានុពលខ្ពស់ អាចវិនិយោគដោយផលិតផលបច្ចេកវិទ្យាបាន ជាក់ស្ដែងក្រុមហ៊ុននឹងពង្រឹង និងពង្រីកទីផ្សារតាមរយៈការដាក់រោងចក្រដំឡើង / ផលិត iPhone នៅឥណ្ឌាផ្ទាល់។
រដ្ឋមន្ត្រី IT នៃរដ្ឋ Karntaka របស់ឥណ្ឌាលោក Priyank Kharge បានលើកឡើងនៅលើបណ្ដាញសង្គម Twitter ដូច្នេះថា៖ “គោលបំណងរបស់ Apple ក្នុងការផលិត iPhone នៅ Bengaluru នឹងអភិវឌ្ឍប្រព័ន្ធអេកូឡូស៊ី និងសង្វាក់ផ្គត់ផ្គង់បច្ចេកវិទ្យាទំនើបនៅក្នុងរដ្ឋនេះ”។ ដោយការផលិត iPhone ក្នុងស្រុក (ប្រទេសឥណ្ឌាផ្ទាល់) នោះ ទូរស័ព្ទទំនើបនេះ អាចនឹងកើបទីផ្សារបានខ្ពស់ជាងមុន។
សូមបញ្ជាក់ថា ឆ្នាំ២០១៦ កន្លងទៅ Apple បានចែកចាយលក់ iPhone ដាច់បាន ២,៥លានគ្រឿងនៅប្រទេសឥណ្ឌា តាមពីក្រោយ Samsung ដែលជាក្រុមហ៊ុនដឹកមុខគេលើចំណែកទីផ្សារស្មាតហ្វូនក្នុងប្រទេសឥណ្ឌា។ ដោយការបង្កើតរោងចក្រដំឡើង iPhone នៅឥណ្ឌានេះ ក្រុមហ៊ុនបច្ចេកវិទ្យាខ្នាតយក្សនៅក្រុង Cupertino របស់អាមេរិកនេះ នឹងអាចបង្កើតហាងលក់រាយផ្ទាល់នៅលើទីផ្សារស្មាតហ្វូនធំបំផុតនេះមិនខាន៕
ប្រែសម្រួល៖ រឹទ្ធិរាជ
ប្រភព៖ Bloomberg
