ខែ​ក្រោយ​នេះ Apple នឹង​រៀបចំ​ព្រឹត្តិការណ៍​ប្រកាស iPad Pro ស៊េរី​ថ្មី, iPhone SE ទំហំ 128GB, ខ្សែ​នាឡិកា Apple Watch និង​ជាច្រើន​ទៀត​



យោងតាម​របាយការណ៍​ពី​គេហទំព័រ Mac Otakara ថ្មីៗ​នេះ​ឱ្យ​ដឹង​ថា ក្រុមហ៊ុន Apple នឹង​ប្រារព្ធ​ធ្វើ​ព្រឹត្តិការណ៍​បង្ហាញ​សមិទ្ធផល​ថ្មីៗ​របស់​ខ្លួន​ក្នុង​ខែ​មីនា​ក្រោយ​នេះ។ សមិទ្ធផល​ទាំង​នោះ​រួម​មាន iPad Pro ជំនាន់​ថ្មី, ទូរស័ព្ទ iPhone 5SE ​ទំហំ 128GB និង​ឧបករណ៍​ជាច្រើន​ផ្សេង​ទៀត។ លើស​ពី​នេះ សាធារណជន​ក៏​នឹង​អាច​ឃើញ iPhone 7 និង 7 Plus ពណ៌​ថ្មី គឺ​ពណ៌​ក្រហម ក៏​ដូច​ជា​ខ្សែ​នាឡិកា Apple Watch ចេញ​ថ្មី​ផង​ដែរ។

តាម​រយៈ​ការ​អភិវឌ្ឍ iPhone 5SE បំពេញ​តម្រូវការ​អ្នក​ប្រើប្រាស់​សព្វថ្ងៃ​មិន​ចេញ​ស្មាតហ្វូន​កំពូលៗ​ដទៃ ព្រម​ជាមួយ​តម្លៃ​សមរម្យ​របស់​វា គេ​ជឿ​ថា ទូរស័ព្ទ​នេះ​នឹង​ទទួល​បាន​ការ​ពេញ​និយម​ខ្លាំង។ ជម្រើស 128GB ​គឺ​ធំ​ជាង 16GB និង 64GB ដែល​មាន​នៅ​លើ​ម៉ូដែល​សព្វ​ថ្ងៃ។ ដូច្នេះ​ប្រិយមិត្ត​ដែល​នៅ​ស្នេហា iPhone អេក្រង់​តូច ៤អ៊ីញ​អាច​នឹង​ពេញ​ចិត្ត​ជាមួយ​ទំហំ​ថ្មី​នេះ។ iPhone SE ​នេះ ត្រូវ​គេ​រំពឹង​ថា នឹង​មាន​តម្លៃ​ចន្លោះ​ពី ៤៩៩ដុល្លារ ទៅ ៥៤៩ដុល្លារ ខណៈ​ដែល iPhone 8 ​វិញ បើ​គ្មាន ១ខ្ទាស់ ($1000) កុំ​លូក​នោះ។ ងាក​មក iPad Pro ជំនាន់​ថ្មី​វិញ ក៏​ត្រូវ​ប្រភព​ដដែល​អះអាង​ថា នឹង​បង្ហាញ​ខ្លួន​ផ្លូវការ​ក្នុង​ខែ​ក្រោយ​ជា​មិន​ខាន។ iPad Pro ថ្មី​នឹង​មាន​ទំហំ​អេក្រង់​ខុស​ពី​ជំនាន់​មុនៗ​ដែល​មាន ១០,៥អ៊ីញ ខុស​ពី​ម៉ូដែល ៩,៧អ៊ីញ និង ១២,៩អ៊ីញ។ ក្នុង​នោះ ក៏​ត្រូវ​គេ​រំពឹង​ទៀត​ថា នឹង​មាន iPad Mini 4 បង្ហាញ​ខ្លួន​អម​ជាមួយ​ទំហំ​អេក្រង់​នៅ​រក្សា ៧,៩អ៊ីញ​ដដែល។ គេហទំព័រ MacRumors បាន​អះអាង​ថា iPad ដែល​មាន​អេក្រង់​តូច នឹង​បំពាក់​មក​ជាមួយ speaker ចំនួន៤ ​ហើយ​មាន​កាមេរ៉ា​ក្រោយ​ទំហំ 12MP អម​ជាមួយ​ភ្លើង​ជំនួយ LED Flash, មាន Smart Connector ចំនួន១, មាន​អេក្រង់​ប្រភេទ True Tone ហើយ​អាច​ប្រើ​ជាមួយ​ប៊ិច Apple Pencial ​បាន។ ចំណែក iPad អេក្រង់ ១០,៥អ៊ីញ នឹង​មាន​លក្ខណៈ​សម្បត្តិ​ដូច​គ្នា​នឹង​ម៉ូដែល ៩,៧អ៊ីញ តែ​អាច​ខុស​គ្នា​បន្តិចបន្តួច​ទៅ​លើ​ការ​ឌីហ្សាញ​ផ្នែក​ខាង​ក្រៅ។ បើ​តាម​ចចាមអារ៉ាម​កន្លង​ទៅ​ថា iPad ថ្មី អាច​នឹង​លែង​មាន​ប៊ូតុង Home ទៀត​ហើយ វា​ដូច​ទៅ​ចចាមអារ៉ាម​នៅ​លើ iPhone 8 ដែរ។ ទីបំផុត មាន​របាយការណ៍​លើកឡើង​ជុំវិញ​ពណ៌​ថ្មី​បន្ថែម​នៅ​លើ iPhone 7 និង 7 Plus ហើយ ដែល​វា​អាច​មាន​ពណ៌​ក្រហម នឹង​ត្រូវ​បង្ហាញ​ចេញ​ក្នុង​ព្រឹត្តិការណ៍​ខែ​មីនា​ក្រោយ​នេះ។ ហើយ​ខ្សែ​នាឡិកា Apple Watch ​ស៊េរី​ថ្មីៗ​ក៏​នឹង​ចេញ​ដំណាលគ្នា​ផង​ដែរ៕ ប្រែ​សម្រួល៖ រឹទ្ធិរាជ ប្រភព៖ Mac Otakara
X
5s