បន្ទាប់​ពី​មាន​ព័ត៌មាន​មក​ថា Samsung នឹង​ចេញ​លក់ Galaxy Note 7 ​ដែល​ជួសជុល​ឡើង​វិញ​​នៅ​ក្នុង​ប្រទេស​ឥណ្ឌា និង​វៀតណាម ចំណែក​ពេល​នេះ ក្រុមហ៊ុន​អេឡិចត្រូនិក​យក្ស​កូរ៉េ​ខាង​ត្បូង​នេះ បាន​ចេញ​មក​បំភ្លឺ​ទៅ​នឹង​ចចាមអារ៉ាម​នេះ​ហើយ។ Samsung ប្រចាំ​ប្រទេស​ឥណ្ឌា បាន​ឱ្យ​ដឹង​ថា ក្រុមហ៊ុន​គ្មាន​គម្រោង​ចេញ​លក់​ Note 7 ជួសជុល​ឡើង​វិញ​នៅ​លើ​ទីផ្សារ​ឥណ្ឌា​នោះ​ទេ ប៉ុន្តែ​ក៏​មិន​បាន​និយាយ​ពាក់ព័ន្ធ​ទីផ្សារ​វៀតណាម​ដែរ។ ក្រុមហ៊ុន Samsung ប្រចាំ​នៅ​ឥណ្ឌា​បាន​ឆ្លើយ​បំភ្លឺ​ថា ៖ “របាយការណ៍​ដែល​ថា ក្រុមហ៊ុន Samsung ​ត្រៀម​ចេញ​លក់ Galaxy Note 7 ជួសជុល​ឡើង​វិញ​នៅ​ឥណ្ឌា គឺ​មិន​ពិត​ទេ”។ ចចាមអារ៉ាម​ថ្មីៗ​នេះ​បាន​លើកឡើង​ថា Samsung អាច​នឹង​ចេញ​លក់ Note 7 ​ជាមួយ​កម្រិត​ថ្ម​តូច​ជាង​មុន​ពោល​គឺ​ចន្លោះ​ពី 3000mAh ទៅ 3200mAh ​ខណៈ​ដែល​កម្រិត​ថ្ម​ធម្មតា​គឺ 3500mAh ហើយ​ក៏​អាច​ត្រូវ​បាន​ផលិត​ឡើង​ដោយ​ប្រើ​សំបក​ថ្មី​ផង​ដែរ។ ស្ដាប់​មើល​ទៅ Samsung ទំនង​ពិត​ជា​គ្មាន​គម្រោង​លក់ Note 7 ​ជួសជុល​ឡើង​វិញ​នៅ​ទីផ្សារ​ឥណ្ឌា​មែន ប៉ុន្តែ​គេ​មិន​ប្រាកដ​ថា ទៅ​ថ្ងៃ​មុខ​ក្រុមហ៊ុន​អាច​ប្ដូរ​ចិត្ត​ឬ​យ៉ាង​ណា​ទេ៕ ប្រែ​សម្រួល៖ រឹទ្ធិរាជ ប្រភព៖ NDTV