ស្នាក់ការ​ថ្មី​របស់ Apple ដែល​មាន​រាង​ដូច​​ថាសហោះ ពេល​នេះ​ត្រូវ​បាន​ក្រុមហ៊ុន​ដាក់​ឈ្មោះ​ហៅ​ផ្លូវការ​ហើយ​គឺ Apple Park។ ស្នាក់ការ Apple Park ​នេះ នឹង​ជា​បេះដូង​នៃ​តំបន់ Santa Clara Valley ​ដែល​លាត​សន្ធឹង​ក្នុង​ទំហំ​ផ្ទៃ​ក្រឡា ១៧៥អា។ ស្នាក់​ការ​ដែល​មាន​រាង​អស្ចារ្យ និង​មាន​ដំបូល​ក្រាល​ដោយ​បន្ទះ​សូឡា​នេះ នឹង​រួចរាល់​ក្នុង​ការ​សាងសង់ ក៏​ដូច​ជា​បើក​ដំណើរការ​ចាប់ពី​ខែ​មេសា ឆ្នាំ២០១៧ ខាង​មុខ​នេះ​ហើយ។ https://youtu.be/cuYoAhhWCY8

Apple Park ​នឹង​មាន​មនុស្ស​ធ្វើការ​ជាង ១២០០០នាក់ រយៈពេល​ខ្ទង់ ៦ខែ​ឡើង​ទៅ​លើ ចំណែក​ការ​សាងសង់​អគារ និង​ទី​ចំណត នឹង​បន្ត​អភិវឌ្ឍ​រហូត​ដល់​រដូវ​ក្ដៅ​ឆ្នាំ​នេះ។ អ្វី​ដែល​ពិសេស​នោះ ស្នាក់ការ Apple Park នឹង​ប្រើប្រាស់​ថាមពល​កកើត​ឡើង​វិញ ដោយ​ដំបូង​អគារ​នឹង​ក្រាល​ដោយ​បន្ទះ​សូឡា ដែល​នឹង​ផលិត​ថាមពល ១៧មេហ្គាវ៉ាត់ នឹង​ធ្វើ​ឱ្យ​ក្លាយ​ជា​សួន​ដំឡើង​ថាមពល​សូឡា​ធំ​បំផុត​លើ​ពិភពលោក។

Apple Park ក៏​នឹង​បង្កើត​ជា​កន្លែង​អង្គុយ auitorium ​ចំនួន ១០០០កន្លែង ដែល​នឹង​ត្រូវ​គេ​ហៅ​ថា មហោស្រព​លោក Job “Steve Jobs Theater” ដើម្បី​ផ្ដល់​កិត្តិយស ដល់​អតីត​នាយក​ប្រតិបត្តិ និង​សហ​ស្ថាបនិក​របស់​ក្រុមហ៊ុន Apple។ ក្នុង​បរិវេណ ស្នាក់​ការ​ថ្មី​នេះ ក៏​នឹង​មាន​ហាង Apple Store និង​ហាង​កាហ្វេ​ ដែល​បើក​ជា​សាធារណៈ និង​មាន​អគារ​ស្រាវជ្រាវ និង​អភិវឌ្ឍ R&D ​ក៏​ដូច​ជា​មជ្ឈមណ្ឌល​ហាត់​កីឡា fitness center សម្រាប់​បុគ្គលិក Apple ផង​ដែរ។ ប្រែ​សម្រួល៖ រឹទ្ធិរាជ ប្រភព៖ techspot