មុខងារ​ពិសេស​ផ្ញើ​ប្រាក់​ឱ្យ​គ្នា​តាម​បណ្ដាញ​សង្គម Facebook ទីបំផុត ត្រូវ​បាន​ក្រុមហ៊ុន​ដាក់​ឱ្យ​ដំណើរការ​ជា​លក្ខណៈ​សកល​ហើយ។ គេ​ហៅ​មុខងារ​ផ្ញើ​ប្រាក់​នេះ​ថា TransferWise Bot ដែល​ត្រូវ​បាន​ប្រកាស​ចេញ​កាលពី​ប៉ុន្មាន​ថ្ងៃ​មុន។ ឥឡូវ​នេះ Bot ថ្មី​នេះ អាច​ឱ្យ​អ្នក​ប្រើ ធ្វើការ​ផ្ញើ​ប្រាក់​ឱ្យ​គ្នា​បាន​យ៉ាង​ងាយស្រួល ដែល​ដំណើរការ​បាន​នៅ អាមេរិក អង់គ្លេស កាណាដា អូស្ត្រាលី និង​អឺរ៉ុប​ជាដើម។​

ការ​ប្រើ​អាច​មិន​ពិបាក ស្មុគស្មាញ​អ្វី​នោះ​ទេ ព្រោះ​មុខងារ​នេះ​ប្រើ​នូវ bot ​របស់ TransferWise ដែល​អាច​ផ្ទេរ​ប្រាក់​បាន​ងាយស្រួល ជាមួយ​ការ​ណែនាំ​ក្នុង​កម្មវិធី Facebook Messenger ស្រាប់។ មុខងារ​ទំនើប​នេះ អាច​ឱ្យ​អ្នក​ផ្ទេរ​ប្រាក់​ក្នុង​មួយ​ខែ​បាន ១ពាន់​លាន​ដុល្លារ។ ហើយ​អ្វី​ដែល​ពិសេស​នោះ ​ការ​ប្រើ​មុខងារ​នេះ មិន​ចាំបាច់​ចំណាយ​ថ្លៃ​សេវា​ដោយ​ធនាគារ ឬ​ការ​ប្ដូរ​រូបិយប័ណ្ណ​នោះ​ទេ ពោល​គឺ TransferWise នឹង​ប្រើ​អត្រា​ប្ដូរ​ប្រាក់​ដែល​មាន​បច្ចុប្បន្នភាព​ចុងក្រោយ។ មិន​តែ​ប៉ុណ្ណោះ Facebook bot ថ្មី​នេះ នឹង​ជួយ​ប្រាប់​អ្នក​ប្រើ​អំពី​អត្រា​ប្ដូរប្រាក់ ហើយ​វា​នឹង​ណែនាំ​ពេល​ល្អ​មួយ​សម្រាប់​ការ​ប្ដូរ​ប្រាក់​ថែមទៀត។ សូម​បញ្ជាក់​ថា Facebook ​បាន​អនុញ្ញាត​ឱ្យ​អ្នក​ប្រើ អាច​ផ្ញើ​ប្រាក់​ឱ្យ​គ្នា​តាម​កម្មវិធី Messenger ​អស់​រយៈពេល​ប៉ុន្មាន​ខែ​មក​ហើយ គ្រាន់តែ​ការ​ប្រើ​មិន​ទាន់​ទូលំទូលាយ​នៅ​ឡើយ ចំណែក​ការ​ប្រកាស​ថ្ងៃ​នេះ TransferWise ​គឺ​ដំណើរការ​ជា​សកល​តែម្ដង៕ ប្រែ​សម្រួល៖ រឹទ្ធិរាជ ប្រភព៖ mashable