ហេតុអ្វីអ្នកគួររៀនផ្នែកចិត្តសាស្ត្រ ?
មុខវិជ្ជាចិត្តសាស្ត្រហាក់បីដូចជាមុខវិជ្ជាមួយ មិនសូវទទួលបានការចាប់អារម្មណ៍ពីសិស្ស និស្សិតភាគច្រើននោះទេ ក៏ព្រោះតែជំនាញនេះមិនសូវត្រូវបានគេទាមទារក្នុងលក្ខខណ្ឌជ្រើសរើសការងារតាមស្ថាប័នការងារធំៗ។ យ៉ាងណាមិញ នៅពេលអ្នកមានបញ្ហាទំនាក់ទំនងជាមួយមនុស្សជុំវិញខ្លួន ដំណើរជីវិតមិនប្រព្រឹត្តទៅរលូនទាំងផ្លូវកាយនិងផ្លូវចិត្ត រួមនឹងបញ្ហាចោទឡើងជាច្រើនផ្សេងទៀត ដែលមករារាំងភាពសុខដុមរមនានៃផ្នែកមួយចំនួនក្នុងជីវិតអ្នក នោះការយល់ដឹងពីចិត្តសាស្ត្រនឹងក្លាយជាចំណេះដឹងដ៏សំខាន់បំផុត ជាអ្វីដែលមនុស្សមិនអាចខ្វះបានក្នុងការលើកកម្ពស់គុណភាពជីវិតរបស់ពួកគេ។ ចិត្តគំនិត ឬការគិតរបស់មនុស្សគឺជាអ្វីៗគ្រប់យ៉ាងដែលបង្កើតជាតថភាពពិតនៃជីវិតរបស់យើងម្នាក់ៗ។ ការគិតជាអ្នកបង្គាប់បញ្ជាទៅលើទង្វើ និងសកម្មភាពរបស់អ្នក ដូច្នេះអ្នកគិតបែបណា អ្នកក៏នឹងទទួលផលបែបនោះដែរ។ តើមានមូលហេតុសំខាន់ៗអ្វីខ្លះ ដែលគាំទ្រនឹងគំនិតថាអ្នកគួរតែសិក្សាពីចិត្តសាស្ត្រ ?
១) ចិត្តសាស្ត្រជួយអ្នកឲ្យយល់ពីខ្លួនឯងនិងអ្នកដទៃកាន់តែប្រសើរជាងមុន៖ ការសិក្សាពីចិត្តសាស្ត្រ គឺជាដំណើរការណ៍ស្វែងយល់អំពីថា តើការគិតរបស់អ្នកបង្កើតឡើងយ៉ាងដូចម្ដេច ? តើកត្តាអ្វីខ្លះដែលមានឥទ្ធិពលទៅលើការគិតរបស់អ្នក ? ហេតុអ្វីអ្នកស្ដែងចេញនូវទង្វើបែបណាមួយមក ? ការសិក្សាពីចិត្តសាស្ត្រប្រៀបដូចជាការធ្វើដំណើររុករកនៅក្នុងខួរក្បាលរបស់មនុស្ស ជាដើមហេតុដែលបង្កឲ្យមានតថភាពរបស់មនុស្សម្នាក់ឡើង។ នៅពេលអ្នកមានការយល់ដឹងពីរឿងរ៉ាវទាំងនេះហើយ អ្នកនឹងដឹងថាត្រូវចាប់ផ្ដើមពីចំណុចណា ដើម្បីលើកកម្ពស់គុណភាពជីវិតរបស់អ្នក ក៏ដូចជាទំនាក់ទំនងអ្នកជាមួយអ្នកដទៃផងដែរ។
២) សមត្ថភាពក្នុងការរិះគិតវិភាគរបស់អ្នកនឹងមានកម្រិតខ្ពស់ជាងមុន៖ ដំណើរការណ៍នៃការសិក្សាពីចិត្តសាស្ត្រ នឹងនាំអ្នកទៅស្វែងយល់អំពីការសម្រេចចិត្ត និងការដោះស្រាយបញ្ហា ដែលសុទ្ធតែជាការហ្វឹកហាត់បណ្ដុះសមត្ថភាពខួរក្បាលរបស់អ្នកឲ្យកាន់តែខ្ពស់ឡើងក្នុងការដោះស្រាយបញ្ហាផ្សេងៗក្នុងជីវិត ក៏ព្រោះតែអ្នកដឹងថាអ្វីជាឫសគល់បង្កជាបញ្ហាណាមួយពិតប្រាកដ។
៣) ចំណេះដឹងពីចិត្តសាស្ត្រនឹងភ្ជាប់ការយល់ដឹងរបស់អ្នកចំពោះជំងឺផ្លូវចិត្ត៖ បើទោះជាអ្នកមិនមែនសិក្សាចិត្តសាស្ត្រក្នុងគោលបំណងក្លាយជាអ្នកអាជីពព្យាបាលជំងឺតាមផ្លូវចិត្តក៏ដោយ ក៏អ្នកអាចប្រើប្រាស់នូវអ្វីដែលអ្នកបានសិក្សាអំពីចិត្តសាស្ត្រ ទៅជួយមនុស្សជុំវិញខ្លួនអ្នកនៅពេលពួកគេស្ថិតក្នុងស្ថានភាពទាក់ទងនឹងជំងឺផ្លូវចិត្ត។ មិនតែប៉ុណ្ណោះ នៅពេលអ្នកដឹងថាការគិតរបស់អ្នកគឺជាគ្រាប់ពូជបណ្ដុះនូវទង្វើរបស់អ្នកឡើង អ្នកក៏នឹងអាចដឹងពីវិធីក្នុងការបំបាត់ភាពតានតឹងទាំងឡាយជាលទ្ធផលមកពីបញ្ហាស្មុគស្មាញក្នុងជីវិត និងបន្ថែមនូវសោភណភាពចូលមកក្នុងជីវិតវិញ៕
ប្រែសម្រួល៖ ស្រីពៅ
ប្រភព៖ www.verywell.com
