ថ្មីៗ​នេះ ក្រុមហ៊ុន​ទូរស័ព្ទ​ចិន ZTE ​ទើប​ប្រកាស​ចេញ​ស្មាតហ្វូន​ស៊េរី​ថ្មី​នៅ​ក្នុង​សមាជ MWC 2017 ចំនួន ២ម៉ូដែល​គឺ Blade V8 mini និង Blade V8 Lite។ ចំណុច​ពិសេស​នៅ​លើ​ស្មាតហ្វូន​ថ្មី​ទាំង​ពីរ គឺ​ត្រូវ​បាន​បំពាក់​កាមេរ៉ា​ភ្លោះ និង​ទ្រនាប់​ស្កេន​ក្រយៅដៃ​នៅ​ផ្នែក​ខាង​ក្រោយ។

ZTE Blade V8 Mini

ម៉ូដែល Blade V8 Mini ត្រូវ​បាន​ផលិត​សម្រិតសម្រាំង​សម្រាប់​អតិថិជន​គោលដៅ​ដែល​ស្រឡាញ់​ការ​ថត​រូប ​ព្រោះ​បំពាក់​ដោយ​កាមេរ៉ា​ក្រោយ​ចំនួន២។ កាមេរ៉ា​ក្រោយ​មាន​ទំហំ 13MP ​ជា​កាមេរ៉ា​គោល និង​មួយ​ទៀត​ទំហំ 2MP ជាមួយ​កម្រិត​ថត f/1.0-f/8.0។ ចំណែក​កាមេរ៉ា​មុខ​ទូរស័ព្ទ​នេះ មាន​ទំហំ 5MP។ អេក្រង់​របស់ Blade V8 Mini មាន​ទំហំ ៥អ៊ីញ​កម្រិត 720p ​ហើយ​បំពាក់​ដោយ​បន្ទះ​ឈីប Qualcomm Snapdragon 435 (28nm, 8x1.4GHz Cortex-A53 CPU, Adreno 505GPU), មាន RAM 2GB, Memory ទំហំ 16GB ​និង​អាច​បន្ថែម microSD បាន។ ថ្ម​របស់​វា​មាន​កម្រិត 2800mAh ដើរ​ដោយ Android Nougat។ Blade V8 Mini នឹង​មាន​លក់​លើ​ទីផ្សារ​អាស៊ី​ប៉ាស៊ីភិច និង​អឺរ៉ុប​ក្នុង​ពេល​ឆាប់ៗ​ខាង​មុខ ប៉ុន្តែ​មិន​ទាន់​បាន​បញ្ជាក់​ពី​តម្លៃ​នៅ​ឡើយ។

ZTE Blade V8 Lite

ងាក​មក​មើល Blade V8 Lite វិញ គឺ​ជា​ស្មាតហ្វូន​ស៊េរី​ថ្មី​មួយ​ទៀត​របស់ ZTE ទើប​ប្រកាស​ចេញ​នៅ MWC 2017 នេះ។ ម៉ូដែល V8 Lite ជា​ស្មាតហ្វូន​ធុន​មធ្យម មិន​មាន​កាមេរ៉ា​ភ្លោះ​ដូច V8 Mini នោះ​ទេ។ វា​មាន​អេក្រង់​ទំហំ ៥អ៊ីញ​កម្រិត 720p ​ហើយ​បំពាក់​ដោយ​បន្ទះ​ឈីប MT6750, មាន RAM 2GB ​និង Memory ម៉ាស៊ីន​ទំហំ 16GB អាច​បន្ថែម microSD បាន។ កាមេរ៉ា​មួយ​គ្រាប់​ស្ថិត​នៅ​ខ្នង​ទូរស័ព្ទ​មាន​ទំហំ 8MP (យ៉ាង​ហោច​ក៏​មាន autofocus ដែរ), រីឯ​កាមេរ៉ា​មុខ​ទំហំ 5MP, ទូរស័ព្ទ​ដំណើរការ​ដោយ​ប្រព័ន្ធ​ប្រតិបត្តិការ Android 7.0 ​និង​មាន​កម្រិត​ថ្ម 2500mAh។ Blade V8 Lite នឹង​មាន​លក់​នៅ​លើ​ទីផ្សារ​អ៊ីតាលី អាល្លឺម៉ង់ និង​អេស្ប៉ាញ​ក្នុង​ពេល​ឆាប់ៗ​ខាង​មុខ ប៉ុន្តែ​មិន​ត្រូវ​បាន​បញ្ជាក់​តម្លៃ​នៅ​ឡើយ៕ ប្រែ​សម្រួល៖ រឹទ្ធិរាជ ប្រភព៖ gsmarena