ក្រុមហ៊ុន​បច្ចេកវិទ្យា​ធំៗ ​គឺ​មាន​ឥទ្ធិពល​ខ្លាំង​ទៅ​លើ​បម្រើបម្រាស់​ថាមពល។ ចំណុច​សំខាន់​មួយ​ក្នុង​តម្រូវការ​ប្រើប្រាស់​ថាមពល ក៏​ដើម្បី​ផ្គត់ផ្គង់​មជ្ឈមណ្ឌល​ទិន្នន័យ​ធំៗ (Data Center) និង​ផ្គត់ផ្គង់​ក្នុង​អគារ​តូច​ធំ ក្នុង​បម្រើបម្រាស់​ប្រចាំ​ថ្ងៃ។ ក្នុង​នោះ Amazon ក៏​ជា​ក្រុមហ៊ុន​មួយ​ដែល​បាន​ចាយ​ទៅ​លើ​ប្រភព​ថាមពល​មិន​តិច​ទេ កន្លង​មក។ តាម​សេចក្ដី​រាយការណ៍​ថ្មី​នៅ​លើ​គេហទំព័រ techspot ឱ្យ​ដឹង​ថា Amazon មាន​គម្រោង​ក្រាល​បន្ទះ Solar ​ទៅ​លើ​ដំបូល​ឃ្លាំង​ចែកចាយ​របស់​ខ្លួន ដើម្បី​ថែ​រក្សា​បរិស្ថាន ក្រៅពី​អាច​ចំណេញ​ថ្លៃ​ផ្គត់ផ្គង់​ថាមពល​អគ្គិសនី​ហើយ​នោះ។ https://youtu.be/R7tMiQcF9tY ក្រុមហ៊ុន​លក់​ទំនិញ​អនឡាញ​ល្បី​បំផុត​នៅ​អាមេរិក​នេះ ​បាន​ប្រកាស​ជា​សាធារណៈ​អំពី​គម្រោង​ដំឡើង​ដំបូល​ប្រើ​ប្រព័ន្ធ​សូឡា​របស់​ខ្លួន ទៅ​លើ​ទីតាំង​ឃ្លាំង​យ៉ាង​ហោច ៥០កន្លែង​នៅ​អាមេរិក​ខាង​ជើង។ គម្រោង​នេះ ត្រូវ​ក្រុមហ៊ុន​រំពឹង​ថា ត្រឹម​ចុង​ឆ្នាំ២០១៧ នឹង​អាច​ទាញ​ថាមពល ៤១មេហ្គាវ៉ាត់​ចេញ​ពី​ថាមពល​សូឡា។ សូម​បញ្ជាក់​ថា បច្ចុប្បន្ន​ Amazon មាន​គម្រោង​ប្រើប្រាស់​ថាមពល​បៃតង​រួច​មក​ហើយ គឺ​ដោយ​ទាញ​យក​ថាមពល​អគ្គិសនី​ពី​ខ្យល់។ ក្រុមហ៊ុន​មាន​កសិដ្ឋាន​ខ្យល់​ជាច្រើន​កន្លែង​ដូច​ជា នៅ រដ្ឋតិចសាស់ រដ្ឋ Indiana រដ្ឋ Carolina ខាងជើង រដ្ឋអូហៃយ៉ូ និង​រដ្ឋ Virginia ដែល​អាច​ជួយ​ផ្ដល់​ថាមពល​ផ្គត់ផ្គង់​មជ្ឈមណ្ឌល AWS Data Centers បាន​យ៉ាង​ល្អ។ ចំណែក​ការ​ដំឡើង​ប្រើប្រាស់​ថាមពល​បៃតង​ថ្មី​នេះ នឹង​ផលិត​បាន​ថាមពល​ច្រើន​ជាង​មុន​រហូត ១០ដង​ឯណោះ៕ ប្រែ​សម្រួល៖ រឹទ្ធិរាជ ប្រភព៖ techspot