នៅ​ឆ្នាំ​នេះ ក្រុមហ៊ុន Apple ត្រូវ​សាធារណជន​រំពឹង​ថា នឹង​សម្ពោធ​ទូរស័ព្ទ​ទំនើប iPhone 8 ​ម្ដង ៣ម៉ូដែល ដោយសារ​ក្រុមហ៊ុន​បន្ថែម​ជម្រើស​ប្រភេទ​អេក្រង់​ថ្មី​ OLED។ ម៉ូដែល​ថ្មី​ខុស​គ្នា​មួយ​ក្នុង​ចំណោម ៣ម៉ូដែល គឺ​នឹង​មាន​ទំហំ​អេក្រង់ ៥,៨អ៊ីញ ដែល​នឹង​ប្រើ​អេក្រង់ OLED ផលិត​ដោយ​ក្រុមហ៊ុន Samsung។ របាយការណ៍​ថ្មី​មួយ​ឱ្យ​ដឹង​ថា iPhone 8 Plus ដែល​ភ្ជាប់​អេក្រង់ OLED display ​នឹង​មិន​បង្ហាញ​ខ្លួន​ជាមួយ​ទំហំ​អេក្រង់ ៥,៥អ៊ីញ​ដូច​ចចាមអារ៉ាម​មុនៗ​លើកឡើង​នោះ​ទេ ពោល​គឺ​វា​មាន​ទំហំ​ធំ​ជាង​នេះ ៥,៨អ៊ីញ។ ចំណែក iPhone 8 ពីរ​ម៉ូដែល​ផ្សេង​ទៀត នឹង​មាន​ប្រភេទ​អេក្រង់ LCD ​ហើយ​ទាំង​បី​ម៉ូដែល គឺ​នឹង​ត្រូវ​សម្ពោធ​ចេញ​ជាមួយ​រូបរាង​ឌីហ្សាញ​ថ្មី​ប្លែក អាច​ស្រោប​ដោយ​ស៊ុម​ដែក​អ៊ីណុក ហើយ​ខ្នង​ទូរស័ព្ទ​នឹង​ក្រាល​ដោយ​កញ្ចក់​ប្លែក​ពី​ស៊េរី iPhone 5, 6 និង 7 បច្ចុប្បន្ន។ iPhone ​ស៊េរី​ក្រោយ​នេះ នឹង​បំពាក់​មក​ជាមួយ​អង្គ​ប្រតិបត្តិ​ជំនាន់​ថ្មី​របស់ Apple ​ហើយ​ក៏​នឹង​ដំណើរការ​ដោយ​ប្រព័ន្ធ​សូហ្វ៊ែរ iOS ជំនាន់​ថ្មី​ផង​ដែរ។ Apple ត្រូវ​សាធារណជន​រំពឹង​ថា នឹង​ប្រកាស iPhone 8 ​នៅ​ពេល​ណាមួយ​ក្នុង​ខែ​កញ្ញា ខណៈ iOS ​ជំនាន់​ថ្មី​នឹង​ត្រូវ​បញ្ចេញ​ដោយ​ក្រុមហ៊ុន​ក្នុង​សន្និសីទ​អ្នក​អភិវឌ្ឍ​កម្មវិធី​លំដាប់​ពិភពលោក WWDC។ ឆាប់ៗ​ខាង​មុខ យើង​នឹង​បាន​ចម្លើយ​កាន់តែ​លំអិត​ទៅ​លើ​លក្ខណៈ​សម្បត្តិ​នៃ iPhone ថ្មី​នេះ រួម​ទាំង​ម៉ូដែល iPhone ភ្ជាប់​អេក្រង់​ថ្មី OLED ​ទំហំ ៥,៨អ៊ីញ៕ ប្រែ​សម្រួល៖ រឹទ្ធិរាជ ប្រភព៖ Nikkei