ក្រុមហ៊ុន Apple ​ត្រូវ​គេ​រំពឹង​ថា ប្រហែល​កំពុង​ធ្វើការ អភិវឌ្ឍ​មុខងារ​ទំនើប​ស្កេន​មុខ (facial recognition) ​សម្រាប់​បំពាក់​ទៅ​លើ iPhone 8 ហើយ​ថ្មីៗ​នេះ មាន​សេចក្ដី​រាយការណ៍​មក​ថា ស្មាតហ្វូន​កំពូល Galaxy S8 របស់ Samsung ក៏​អាច​បំពាក់​បច្ចេកវិទ្យា​ស្កេន​មុខ​នេះ​ផង​ដែរ។ ព័ត៌មាន​នេះ ត្រូវ​បាន​រាយការណ៍​ចេញ​ពី​គេហទំព័រ​វិនិយោគិន The Investor ​ដែល​អះអាង បាន​ទទួល​ព័ត៌មាន​លំអិត​ផ្លូវការ អំពី​មុខងារ​ថ្មី​នេះ ពី​ក្រុមហ៊ុន Samsung ផ្ទាល់​តែម្ដង។ នៅ​ក្នុង​អត្ថន័យ​នៃ​ការ​បកស្រាយ​នោះ​លើកឡើង​ដូច្នេះ​ថា ដោយសារ​មុខងារ​ស្កេន​ប្រស្រី​ភ្នែក នៅ​មាន​កម្រិត ដូច​ជា​នៅ​លើ​ល្បឿន និង​ការ​ប្រតិបត្តិ​បាន​ត្រឹមត្រូវ​នោះ ដូច្នេះ ក្រុមហ៊ុន Samsung អាច​សម្រេច​ចិត្ត បន្ថែម​មុខងារ​ស្កេន​មុខ​មាត់ (facial recognition) ទៅ​លើ S8។ នេះ​ជា​សម្ដី​អះអាង​ចេញ​ពី​ក្រុមហ៊ុន Samsung ផ្ទាល់។ “ជាមួយ face scanner វា​នឹង​ដំណើរការ​ល្បឿន​យ៉ាង​លឿន មិន​ដល់​រយៈពេល ០,០១វិនាទី​ផង​ទេ ក្នុង​ការ​ដោះ​សោ​ទូរស័ព្ទ”។ Galaxy S8 ត្រូវ​គេ​រំពឹង​ថា នឹង​បំពាក់​មក​ជាមួយ​អេក្រង់​ទំហំ ៥៨អ៊ីញ ហើយ S8 Plus នឹង​មាន​ទំហម ៦,២អ៊ីញ និង​បំពាក់​ឈីប Qualcomm Snapdragon 835 អម​ដោយ RAM 4GB។ លក្ខណៈ​សម្បត្តិ​ផ្សេង​ទៀត គឺ​នឹង​មាន Memory ​ម៉ាស៊ីន​ទំហំ 64GB ​អាច​ដោត​កាត microSD ​បាន ហើយ​មាន​កាមេរ៉ា​ភ្លោះ​ទំហំ 12MP។ កំពូល​ស្មាតហ្វូន Android នឹង​ត្រូវ​វែកមុខ​ផ្លូវការ​នៅ​ក្នុង​ព្រឹត្តិការណ៍ Samsung Unpacked ​ដែល​នឹង​ប្រារព្ធ​ធ្វើ​នៅ​ថ្ងៃ​ទី២៩ ខែ​មីនា​នេះ ហើយ​រំពឹង​នឹង​ចេញ​លក់​នៅ​លើ​ទីផ្សារ​ចាប់ពី​ខែ​មេសា។ S8 នឹង​ត្រូវ​ដាក់​ឱ្យ​បញ្ជា​ទិញ​នៅ​ថ្ងៃ​ទី១០ មេសា ហើយ​មាន​លក់​នៅ​ថ្ងៃ​ទី២១ មេសា៕ ប្រែ​សម្រួល៖ រឹទ្ធិរាជ ប្រភព៖ The Investor