ខណៈដំណឹង iPhone 8 កំពុងមានការចាប់អារម្មណ៍តាមដានយ៉ាងស្អិត ព្រោះជាកំពូលទូរស័ព្ទល្បី និងពេញនិយមសម្រាប់យុវវ័យនោះ ពេលនេះក៏លេចឮដំណឹងអំពីថេប្លេត iPad Pro ស៊េរីថ្មីវិញម្ដង។ យោងតាមរបាយការណ៍ថ្មីមួយ ឱ្យដឹងថា ពេលនេះ ក្រុមហ៊ុន Apple កំពុងធ្វើតេស្តលើ iPad Pro ជំនាន់ថ្មីដល់ទៅ ៤ម៉ូដែល។ ក្រុមហ៊ុន អាចនឹងប្រកាសចេញ iPad Pro ថ្មីនេះ នៅសប្ដាហ៍ខាងមុខ។
iPad Pro ស៊េរីថ្មីទាំង ៤ម៉ូដែលនោះ មានទំហំអេក្រង់ខុសៗគ្នាគឺ ទំហំ ៧,១អ៊ីញ, ៧,២អ៊ីញ, ៧,៣អ៊ីញ និងអេក្រង់ ៧,៤អ៊ីញ។ iPad Pro ថ្មីនឹងដំណើរការដោយប្រព័ន្ធប្រតិបត្តិការដែលមានការច្របាច់បញ្ចូលគ្នារវាង iOS 10.3 beta និង iOS 11។ យោងតាមលោក Ming-Chi Kuo អ្នកវិភាគមកពីក្រុមហ៊ុន KGI Securities អះអាងថា Apple នឹងបញ្ចេញ iPad Pro ស៊េរីថ្មីម្ដង ៣ម៉ូដែល ដែលមានទំហំ ៩,៧អ៊ីញ និង ១២,៣អ៊ីញ និងម៉ូដែលមួយទៀតទំហំ ១០,៥អ៊ីញ។
ផ្អែកតាមសេចក្ដីរាយការណ៍ពីគេហទំព័រ MacRumors ឱ្យដឹងថា ក្រុមហ៊ុន Apple នឹងប្រកាសចេញ iPad Pro ស៊េរីថ្មី នៅចន្លោះថ្ងៃទី២០ ទៅថ្ងៃទី២៤ ខែមីនានេះ។ របាយការណ៍កន្លងទៅ ធ្លាប់បានលើកឡើងថា ក្នុងឆ្នាំ២០១៧ នេះ Apple នឹងបញ្ចេញ iPad Pro ម្ដង ៣ម៉ូដែល។ វាអាចជារឿងចម្លែកដែល ឆ្នាំនេះ Apple ហាក់សំងំស្ងៀមមិនប្រារព្ធពិធីសម្ពោធផលិតផលថ្មី ខុសប្លែកពីឆ្នាំមុន ២០១៦ និង ២០១៥ ដែលធ្លាប់តែប្រកាសនូវព្រឹត្តិការណ៍បង្ហាញថេប្លេត iPad ជំនាន់ថ្មី។
iPad គឺជាថេប្លេតពេញនិយមមួយនៅលើទីផ្សារ យ៉ាងណា នៅក្នុងត្រីមាសទី១ ដែលបញ្ចប់ត្រឹមចុងខែធ្នូ ២០១៦ កន្លងទៅ Apple រកប្រាក់ចំណូលបាន ៥,៥ពាន់លានដុល្លារពីការលក់ iPad ប្រមាណ ១៣,៣លានគ្រឿង។ តួលេខប្រាក់ចំណូល Apple បានពីការលក់ថេប្លេតគឺធ្លាក់ចុះ ២២% ប្រៀបធៀបការលក់ថេប្លេតប្រចាំឆ្នាំ។ ដូច្នេះ រង់ចាំមើលថាតើ ឆ្នាំ២០១៧ នេះ Apple មានយុទ្ធសាស្ត្របង្កើនការលក់យ៉ាងណា តើ iPad Pro ស៊េរីថ្មីនឹងមានអ្វីរឹតតែពិសេសដើម្បីអន្ទងចិត្តអ្នកប្រើប្រាស់?
ប្រែសម្រួល៖ រឹទ្ធិរាជ
ប្រភព៖ phonearena
