បន្ទាប់​ពី​បាន​សម្ពោធ​ចេញ​កុំព្យូទ័រ​ស៊េរី​ថ្មី Book One ​ដើម​ឆ្នាំ២០១៧ នេះ​រួច​មក ពេល​នេះ​សមិទ្ធផល​ថ្មី​របស់​ក្រុមហ៊ុន Porsche Design នេះ ត្រូវ​បាន​រុញ​ទៅ​ដល់ FCC ហើយ នឹង​មាន​លក់​នៅ​លើ​ទីផ្សារ​ចាប់ពី​ខែ​មេសា​ខាង​មុខ។ ពេល​នេះ Porsche Design Book One ត្រូវ​បាន​បើក​ឱ្យ​អតិថិជន​ធ្វើ​ការ​បញ្ជា​ទិញ​មុន​បាន ចាប់ពី​តម្លៃ ២៤៩៥ដុល្លារ​ហើយ។

កុំព្យូទ័រ​មាន​ការ​ឌីហ្សាញ​ស្រដៀង​កុំព្យូទ័រ Apple MacBook ​និង​កាត់​ស្ទីល​តាម Microsoft Surface ដោយ​មាន​ប៊ិច​សម្រាប់​ប្រើ​ជាមួយ​នេះ នឹង​មាន​លក់​នៅ​លើទីផ្សារ​ចាប់ពី​ថ្ងៃ​ទី២១ ខែ​មេសា​ខាងមុខ។ សង្ខេប​ឡើង​វិញ​ចំពោះ​លក្ខណៈ​សម្បត្តិ​កុំព្យូទ័រ Book One របស់ Porsche Design វា​គឺ​ជា​កុំព្យូទ័រ 2-in-1 Laptop ​ដែល​មាន​អេក្រង់​ទំហំ ១៣,៣អ៊ីញ អាច​ដក​ដាច់​ចេញ​ពី​ក្ដារ​ចុច (keyboard) ​និង​មាន​ទំហំ resolution 3200x1800px។ Laptop ទំនើប​របស់​ក្រុមហ៊ុន​ឯកទេស​ឌីហ្សាញ​ម៉ូត​ផលិតផល​នៅ​អាល្លឺម៉ង់​នេះ ត្រូវ​បាន​បំពាក់​ដោយ​អង្គ​ប្រតិបត្តិ Intel Core i7-7500U Kaby Lake ​គាំទ្រ RAM ​ទំហំ 16GB ​ជាមួយ​អង្គ​ផ្ទុក​ទិន្នន័យ​ប្រភេទ PCIe Solid state drive ទំហំ 512GB។ រីឯ​តំណភ្ជាប់​មាន​ដូច​ជា រន្ធ Thunderbolt 3/USB-C, microSD card និង​រន្ធ USB ធម្មតា៕ ប្រែ​សម្រួល៖ រឹទ្ធិរាជ ប្រភព៖ Liliputing