Apple នៅ​ពេល​ថ្មីៗ​នេះ ត្រូវ​បាន​គេ​រាយការណ៍​ថា នឹង​បន្ត​កម្មវិធី​ធានា​ដល់​អតិថិជន​ដែល​ទិញ​ទូរស័ព្ទ iPhone ​ពី​ក្រុមហ៊ុន​ផ្ទាល់ ដែល​មាន​ឈ្មោះ​ថា AppleCare+។ ការ​បន្ត​ផ្ដល់​ការ​ធានា​នេះ គឺ​អាច​មាន​រយៈពេល ២ខែ ឬ​ដល់ ១ឆ្នាំ។ សេចក្ដី​រាយការណ៍​ពី​គេហទំព័រ MacRumors ​បាន​អះអាង ទោះជា​យ៉ាងណា ការ​ធានា​នេះ នៅ​ពុំ​ទាន់​មាន​ការ​ប្រកាស​ចេញ​ពី​គេហទំព័រ​លក់​ផលិតផល​ផ្លូវការ​របស់ Apple ​សម្រាប់​សេវា AppleCare+ ​នេះ​នៅ​ឡើយ។ ប្រសិន​បើ​អ្នក​ចូល​ទៅ​គេហទំព័រ https://checkcoverage.apple.com/ ​ហើយ​បញ្ចូល លេខ​ស៊េរី (serial number) របស់​ iPhone (នៅ​ក្នុង Settings ទូរស័ព្ទ) ​អ្នក​នឹង​ទទួល​បាន​ការ​ពន្យារ​ពេល បន្ថែម​សុពលភាព​នៃ​ការ​ធានា​លើ iPhone ពី ៦០ថ្ងៃ ទៅ​ដល់ ១ឆ្នាំ។ នេះ​មាន​ន័យ​ថា ការ​ធានា​លើ​ការ​ទិញ iPhone ​តាម​រយៈ​ក្រុមហ៊ុន Apple ផ្ទាល់ ក៏​ធ្វើ​ឡើង​ទៅ​លើ​ផលិតផល​ផ្សេង​ទៀត ដូច​ជា​កុំព្យូទ័រ Mac និង Apple TV ផង​ដែរ ប៉ុន្តែ Apple Watch និង iPad ​គឺ​នៅ​តែ​មាន​រយៈពេល​កំណត់ បាន​ត្រឹមតែ ២ខែ​ប៉ុណ្ណោះ។ សូម​បញ្ជាក់​ថា Apple បាន​ផ្ដល់​សេវា AppleCare+ ​លើ​ការ​ជួសជុល​អេក្រង់ iPhone ​ដោយ​ការ​ចុះ​តម្លៃ​ពី ៩៩ដុល្លារ មក​ត្រឹម ២៩ដុល្លារ​ប៉ុណ្ណោះ​កាលពី​ខែ​កញ្ញា​ឆ្នាំ​មុន។ ឥឡូវ​នេះ វា​អាច​ជា​ដំណឹង​ល្អ​មួយ សម្រាប់​អតិថិជន​ដែល​បាន​ទិញ iPhone ​ពី Apple ផ្ទាល់ ព្រោះ​ក្រុមហ៊ុន​នឹង​បន្ត​​ការធានា ២ខែ​ទៀត ឬ​ដល់ ១ឆ្នាំ​ឯណោះ៕ ប្រែ​សម្រួល៖ រឹទ្ធិរាជ ប្រភព៖ theverge