បើបរាជ័យ សូមកុំអស់សង្ឃឹម ព្រោះវាក៏ផ្ដល់ប្រយោជន៍សំខាន់៣នេះដែរ
មនុស្សគ្រប់គ្នាសុទ្ធតែស្រឡាញ់ឬចូលចិត្តភាពជោគជ័យ។ ចុះ រឿងបរាជ័យវិញនោះ? តើវាមិនអាចផ្តល់មេរៀនសម្រាប់រៀនសូត្រឬភាពរីកចម្រើនទៅមុខមែនទេ? តាមការពិតទៅ រាល់ភាពជោគជ័យមួយៗសុទ្ធតែឆ្លងកាត់បរាជ័យរាប់មិនអស់។ខាងក្រោមនេះជាអត្ថប្រយោជន៍នៃភាពបរាជ័យ៖
១) ភាពបរាជ័យផ្តល់មេរៀនសម្រាប់សិក្សា៖ ភាពបរាជ័យអាចក្លាយជាគ្រូមួយដ៏ល្អសម្រាប់យើង ទោះបីជាពេលខ្លះវាឈឺចាប់ក៏ដោយ។ ការរៀននូវធ្វើដែលមិនគួរធ្វើគឺមានសារៈសំខាន់ដូចរៀនអ្វីដែលអ្នកគួរធ្វើដែរ។ ភាពបរាជ័យអនុញ្ញាតឲ្យមនុស្សរៀនពីកំហុសនិងរីកចម្រើនទៅមុខ។
២) ភាពបរាជ័យធ្វើឲ្យយើងដាក់ខ្លួន៖ មនុស្សមួយចំនួនតែងមានអំនួតហូសហេតុ ដែលធ្វើឲ្យអ្នកដទៃមើលទៅហាក់ដូចជាមិនចូលភ្នែក។ មនុស្សនឹងគ្មានថ្ងៃចេះដាក់ខ្លួនដើម្បីអាចរស់ក្នុងសង្គមដូចគ្នានោះឡើយ ប្រសិនបើពួកគេមិនស្គាល់ការបរាជ័យខ្លះក្នុងជីវិត។ ដូច្នេះ បើអ្នកបរាជ័យ នោះវានឹងបង្រៀនអ្នកឲ្យក្លាយជាមនុស្សម្នាក់ដែលចេះដាក់ខ្លួន ដើម្បីអាចរស់ជាមួយគេបាន។
៣) ប្រឈមភាពភ័យខ្លាច៖ មនុស្សជាច្រើនមិនហ៊ានធ្វើអ្វីថ្មីដោយសារតែខ្លាចភាពបរាជ័យ។ ប៉ុន្តែ អ្នកមិនអាចជោគជ័យបានទេប្រសិនជាអ្នកខ្លាចភាពបរាជ័យ ពីព្រោះថាភាពបរាជ័យគឺជារឿងគេចមិនផុតឡើយ។ ប្រសិនជាអ្នកហ៊ានប្រឈមមុខនឹងភាពបរាជ័យ អ្នកអាចឆ្ពោះទៅរកក្តីសុបិនរបស់អ្នកបានមិនខាន៕
ប្រែសម្រួល៖ អុឹង មុយយូ ប្រភព៖ www.wisebread.com
