រឿង​ដ៏​រសើប​មួយ​ទើប​កើត​ឡើង​ទៅ​លើ​ក្រុមហ៊ុន Apple ដោយ​មាន​ការ​អះអាង​ពី​ក្រុម Hacker តួកគី​ថា ពួក​គេ​បាន​កាន់កាប់​គណនី​សេវាកម្ម iCloud ប្រមាណ ៥៥៩លាន​នៅ​ពេល​នេះ។ គេ​អាចលុប​ចោល​ទិន្នន័យ​ផ្ទាល់​ខ្លួន​របស់​អ្នក​ប្រើ​ទាំង​នេះ​បាន​គ្រប់​ពេល។ ប៉ុន្តែ​ក្រុម​ឧក្រិដ្ឋជន​អនឡាញ​ដែល​ហៅ​ខ្លួន​ថា Turkish Crime Family នេះ ដាក់​សំណើ​ទៅ Apple ឱ្យ​ប្រគល់​ប្រាក់ ៧៥០០០ដុល្លារ ទៅ ១០០០០០ដុល្លារ ជា​ថ្នូរ​រក្សា​ទិន្នន័យ​របស់​អតិថិជន បើ​មិន​ដូច្នោះ​ទេ គេ​នឹង​កម្ទេច​ចោល។ នៅ​ពេល​នេះ ក្រុមហ៊ុន Apple បាន​ចេញ​មុខ ប្រតិកម្ម​ទៅ​នឹង​ករណី​គំរាមកំហែង​នេះ​ហើយ។

ក្រុមហ៊ុន Apple បាន​ឆ្លើយ​បំភ្លឺ​ទៅ​នឹង​ការ​អះអាង​របស់​ក្រុម hacker ដែល​បាន​ប៉ុនប៉ង​ភ្ជាប់​ចូល​គណនី iCloud ​ខ្ទង់​លាន​របស់​ខ្លួន​ថា សេវាកម្ម​ផ្សេងៗ រួម​ទាំង​សេវាកម្ម​ផ្ទុក​ទិន្នន័យ​អនឡាញ​របស់​ខ្លួន មិន​ត្រូវ​បាន Hacker ​វាយប្រហារ​នោះ​ឡើយ កាន់កាប់​បាន​នោះ​ឡើយ។ អ្នក​នាំ​ពាក្យ​របស់ Apple បាន​លើកឡើង​ដូច្នេះ​ថា គ្រប់​ប្រព័ន្ធ​ណាមួយ រួម​ទាំង iCloud និង Apple ID ​រង​ការ​វាយប្រហារ​ពី Hacker ​នោះ​ឡើយ ហើយ​ការ​លើកឡើង​នូវ​បញ្ជី​អាសយដ្ឋាន​អ៊ីមែល និង​លេខ​សម្ងាត់​នោះ គឺ​គេ​ទទួល​បាន​ពី​សេវាកម្ម Third-party ដែល​បាន​ប្រមូល​យក​ពី​ពេល​មុន​នោះ​ទេ។

ប៉ុន្មាន​ម៉ោង​មុន គេហទំព័រ Motherboard ​បាន​រាយការណ៍​ថា ក្រុម hacker ដែល​ហៅ​ខ្លួន​ថា Turkish Crime Family ​នេះ បាន​អះអាង​ក្ដែងៗ​ថា ពួក​គេ​បាន​កំពុង​ក្ដាប់​​ព័ត៌មាន​លំអិត​របស់​គណនី​សេវាកម្ម iCloud ប្រមាណ ៣០០លាន​គណនី​ហើយ និង​បាន​គំរាម​យក​ប្រាក់ ៧៥០០០ដុល្លារ​តាម​ប្រព័ន្ធ​បង់​ប្រាក់ Bitcoin ឬ Ethereum ​ឬ​ឱ្យ​ជា iTunes gift card ក៏​បាន​គឺ​ស្មើ​នឹង​ទឹកប្រាក់ ១០០០០០ដុល្លារ ជា​ថ្នូរ ទើប​ពួក​គេ​យល់​ព្រម​មិន​ព្រលះ​ទិន្នន័យ​គណនី iCloud ទាំង​នោះ។ ចំពោះ​ចំនួន​គណនី iCloud ដែល​ក្រុម hacker អះអាង​ថា ក្ដាប់​បាន ហាក់​នៅ​មាន​ភាព​ស្រពិចស្រពិល ព្រោះ​ម្នាក់​ក្នុង​ក្រោម​អះអាង​ថា ក្ដាប់​បាន ៣០០លាន​គណនី ខណៈ​ម្នាក់​ផ្សេង​ទៀត ថា ៥៥៩លាន​គណនី៕ ប្រែ​សម្រួល៖ រឹទ្ធិរាជ ប្រភព៖ theverge