កម្មវិធី​ខ្ទង់​លាន គឺ​ស្ថិត​នៅ​ក្រោម​ចង្អុល​ដៃ​របស់​អ្នក ក្រៅពី​នេះ​ គឺ​មាន​តិចតួច​ប៉ុណ្ណោះ​ដែល​អាច​ប្រើ​នៅ​លើ iPhone។ តែ​អ្វី​ដែល​ចម្លែក កម្រ​ឃើញ​នោះ​គឺ សូម្បី​តែ​ប្រព័ន្ធ​ប្រតិបត្តិការ Windows XP ​ក៏​អាច​ត្រូវ​គេ​បញ្ចូល​នៅ​លើ​ទូរស័ព្ទ iPhone 7 បាន​ដែរ! គេ​អាច​សូម្បី​តែ​ដំណើរការ Windows XP ​នៅ​លើ iPhone ដោយ​មិន​ចាំបាច់ jailbreak នោះ​ទេ។ សូម​ទស្សនា​វីដេអូ​ខាង​ក្រោម៖ https://youtu.be/CYv_--ZKWuw បន្ទះ​ឈីប​ជំនាន់​ចុងក្រោយ A10 Fusion របស់ Apple ដែល​បំពាក់​នៅ​លើ​ស៊េរី​ iPhone 7 ធ្វើ​ឱ្យ​វា​ក្លាយ​ជា​ទូរស័ព្ទ​ល្បឿន​លឿន​បំផុត​ក្នុង​ទីផ្សារ​ស្មាតហ្វូន​បច្ចុប្បន្ន។ វា​ប្រហែល​ជា​មាន​ល្បឿន លឿន​ជាង​កុំព្យូទ័រ desktop PC ដែល​អ្នក​បាន​ទិញ​ប្រើ​ជា​ច្រើន​ខែ​កន្លង​មក​ទៅ​ទៀត។ ជា​ការ​ពិត អ្នក​មិន​អាច​លុប​ចោល iOS ហើយ​ទៅ​ដំឡើង​ប្រើ OS X ឬ Windows ជំនួស​វិញ​នោះ​ទេ។ ប៉ុន្តែ​អ្នក​អាច​ដំឡើង​កម្មវិធី emulator ដូច​ជា iBox ​ជាដើម ដែល​អាច​ដំឡើង​តាម Xcode មិន​បាច់ jailbreak ​ក៏​បាន ដើម្បី​គេ​អាច​ដំណើរការ Windows XP ​នៅ​ក្នុង​ទម្រង់​ជា virtual machine បាន។ អ្នក​នឹង​សង្កេត​ឃើញ សូម្បី​បន្ទះ​ឈីប A10 Fusion ​អម​ដោយ RAM 2GB ​ក៏​អាច​ឱ្យ​ដាក់​ប្រព័ន្ធ​ប្រតិបត្តិការ Windows XP ​បាន​ផង​ដែរ ប៉ុន្តែ​ដំណើរការ​ហាក់​ពុំ​សូវ​រលូន​ដូច​ជា​កុំព្យូទ័រ​នោះ​ឡើយ ដោយសារ​វា​រត់​នៅ​ក្នុង​កម្មវិធី emulator ​ដែល​ប៉ះពាល់​ច្រើន​ទៅ​លើ​សមត្ថភាព​ល្បឿន (performance) មួយ​ភាគ​ទៅ​ហើយ៕ ​ប្រែ​សម្រួល៖ រឹទ្ធិរាជ ប្រភព៖ cultofmac