ក្រោយពីលោក Steve Jobs បានឃ្លាតចេញពី Apple ដោយលោកបានទទួលអនិច្ចកម្មតាំងពីឆ្នាំ២០១១ (ថ្ងៃទី៥ ខែតុលា) ឃើញថា ក្រុមហ៊ុនបច្ចេកវិទ្យាយក្សមួយនេះ មានការផ្លាស់ប្ដូរជាច្រើន ដែលបន្តដឹកនាំដោយលោក Tim Cooks របស់មកទល់សព្វថ្ងៃ។ អ្វីដែលផ្លាស់ប្ដូរ ក្នុងនោះរាប់បញ្ចូលទាំងការពង្រីកទំហំអេក្រង់ទូរស័ព្ទ iPhone ស៊េរីក្រោយៗផងដែរ។
កាលពីជំនាន់ លោក Jobs កាន់ Apple ក្រុមហ៊ុននេះមានតែទូរស័ព្ទ iPhone អេក្រង់ ៣,៥អ៊ីញប៉ុណ្ណោះ (លោកទទួលអនិច្ចកម្មក្នុងឆ្នាំ២០១១ ដែល iPhone 4S ត្រូវបង្ហាញខ្លួន)។ លុះចាប់ពី iPhone 5 ដែលជាជំនាន់កាន់កាប់ក្រុមហ៊ុនដោយលោក Cook ឃើញថា អេក្រង់ទូរស័ព្ទ iOS នេះត្រូវបានពង្រីកឡើងទៅ ៤អ៊ីញ និងបន្តពង្រីកដល់ ៤,៧អ៊ីញ និង ៥,៥អ៊ីញដូច iPhone 7 និង 7 Plus បច្ចុប្បន្ន។ ចុះបើលោក Jobs អាចនៅដល់សព្វថ្ងៃ តើលោកអាចពេញចិត្ត ឬមិនពេញចិត្តលើចំណុចណាខ្លះ ចំពោះការកែប្រែអត្តចរិតក្រុមហ៊ុន Apple ដូច្នេះ? ខាងក្រោមនេះ គឺជា ៧ចំណុចដែលបិតាបច្ចេកវិទ្យាដ៏មានឥទ្ធិពលរូបនេះ អាចមិនពេញចិត្ត៖
១) ការពង្រីកអេក្រង់ iPhone ជំនាន់ក្រោយ
សម្រាប់ខ្ញុំ ស្រលាញ់ iPhone អេក្រង់ធំ ដូចជា iPhone 7 Plus ដែលមានអេក្រង់ ៥,៥អ៊ីញតែម្ដង។ ប៉ុន្តែលោក Jobs មានមោទនភាពជាខ្លាំងទៅលើការផលិតទូរស័ព្ទអេក្រង់ ៣,៥អ៊ីញ ដែលលោកយល់ថា វាស័ក្ដិសមក្នុងការកាន់ប្រើក្នុងដៃបំផុត ពោលគឺប្រើដៃតែម្ដង គឺអាចបញ្ជាពេញលក្ខណៈបាន។ យុគសម័យលោក Jobs ដឹកនាំ Apple លោកបានបញ្ចេញលក់ iPhone អេក្រង់ត្រឹម ៣,៥អ៊ីញ ដែលខុសគ្នាដល់ទៅ ២អ៊ីញប្រៀបធៀបម៉ូដែល iPhone 6 Plus, 6S Plus និង 7 Plus ។ យ៉ាងណា អ្នប្រើហាក់ចូលចិត្តប្រើដែលមានអេក្រង់ធំជាង អេក្រង់តូច។ ប៉ុន្តែវាពិបាកដែរ ថា ប្រសិនលោក Jobs នៅដល់សព្វថ្ងៃ តើលោកនឹងស្របតាមយុទ្ធសាស្ត្រអេក្រង់ iPhone ធំ ឬមិនគាំទ្រនោះ។
២) ទិញការច្នៃប្រឌិត (innovation) ជាជាងការទិញក្រុមហ៊ុន
លោក Jobs មានការមើលធ្ងន់លើការបង្កើន និងបង្កើតសមត្ថភាពនៃការច្នៃប្រឌិតថ្មី ជាជាងការបណ្ដុះអគារ ឬទិញក្រុមហ៊ុន។ លោកធ្លាប់បានលើកឡើងថា “យើងស្វែងរកក្រុមហ៊ុន ដែលមានបុគ្គលិកធ្វើការប្រកបដោយវិជ្ជាជីវៈ សមត្ថភាពខ្លាំងផ្នែកបច្ចេកវិទ្យា ហើយស័ក្ដិសមក្នុងការចូលរួមជាមួយ Apple”។ លោកបន្ថែមថា “ចំណាយ លើអ្វីដែលយើងគិតថា ស័ក្ដិសមនឹងតម្លៃ”។
ចំណែកការទិញយកក្រុមហ៊ុនជាច្រើនខ្នាតតូចជាងខ្លួន របស់ Apple ពេលថ្មីៗនេះ វាអាចប៉ះពាល់ដល់សេវាកម្មមួយចំនួន របស់បណ្ដាក្រុមហ៊ុនទាំងនោះ ពោលគឺមិនអាចបម្រើសេវាកម្មទាំងស្រុង គឺមានតែបិទចោល ហើយក៏នឹងប៉ះពាល់ដល់បុគ្គលិក អាចបញ្ឈប់ ឬត្រូវទទួលយកមកប្រមូលផ្ដុំរឹតតែច្រើននៅ Apple ដែលអាចក្លាយជាវិបត្តិទៅវិញ។ ការទទួលទិញក្រុមហ៊ុនធំជាងគេរបស់ Apple គឺទិញ Beats Electronics ក្នុងតម្លៃ ៣ពាន់លានដុល្លារ។
៣) មាន Superstar ច្រើនពេកហើយ នៅក្នុងសំបុក (ក្រុមហ៊ុន Apple)
Apple ក៏ត្រូវបញ្ចូលឱ្យមានភាពទាក់ទាញដោយមានថ្នាក់ដឹកនាំខ្លាំងៗ ព្រោះជាក្រុមហ៊ុនធំ និងត្រចះត្រចង់មួយក្នុងវិស័យបច្ចេកវិទ្យា។ Apple តែងមានតារា superstar នៅក្នុងក្រុមហ៊ុន ប៉ុន្តែក៏តែងតែគ្រប់គ្រងតឹងរ៉ឹងនៅពេលលោក Jobsកំពុងកាន់កាប់ក្រុមហ៊ុនផងដែរ។ បច្ចុប្បន្នក្រុមហ៊ុនមាន Superstar ដូចជា Dr. Dre, Jimmy lovine, Marc Newson និង Jony Ive ជាដើម។ ថ្វីត្បិតជើងខ្លាំងច្រើន នឹងធ្វើឱ្យ Apple កាន់តែចាក់ឫសបានកាន់តែជ្រៅ និងសម្រេចសមិទ្ធផលកាន់តែធំ ប៉ុន្តែវាអាចស្ថិតនៅក្រៅឆន្ទៈចង់បានរបស់លោក Jobs អំឡុងពេលកាន់កាប់ក្រុមហ៊ុនហើយ។
៤) Siri
ពាក់ព័ន្ធផ្នែកបច្ចេកទេស Siri វិញ គឺបានចាប់កំណើតតាំងពីលោក Jobs នៅមានវត្តមាននៅ Apple ម្ល៉េះ។ iPhone 4s ត្រូវបានប្រកាសចេញ ១ថ្ងៃ មុនពេលលោកទទួលអនិច្ចកម្ម ហើយលោក Jobs បានប្រើនូវបច្ចេកវិទ្យានេះ មុនពេលលោកប្រគល់ Apple ឱ្យទៅលោក Cook កាន់កាប់បន្ត។ ប៉ុន្តែទោះបី Siri ត្រូវបានអភិវឌ្ឍ ដោយការច្របាច់បញ្ចូលបច្ចេកវិទ្យាថ្មីៗជាមួយសេវាកម្មផ្សេងៗ តែវានៅតែត្រូវមានគូប្រកួតប្រជែង គឺ Cortana របស់ Microsoft និង Google Now។ មានន័យថា Siri ហាក់មិនទាន់មានការអភិវឌ្ឍដល់ចំណុចកំពូលដែលអាចយកឈ្នះ ១០០% លើសេវាកម្ម Virtual assistant ល្បីផ្សេងៗ នៅឡើយ។
៥) ការ Update iOS លើ iPhone 6 បែរធ្វើឱ្យទូរស័ព្ទក្លាយជាថ្មមួយដុំ ពោលគឺ error ផ្នែកសូហ្វ៊ែរ
ថ្វីបើលោក Jobs បានដឹកនាំ Apple ឱ្យក្លាយជាក្រុមហ៊ុនបច្ចេកវិទ្យាឈានមុន សាច់ដុំធំៗ និងអាចបន្សល់ឈ្មោះមកដល់បច្ចុប្បន្នដោយសារប្រហែលលោកបានរៀបចំគម្រោងសំខាន់ៗខ្លះទុកមុនពិតមែន ប៉ុន្តែបញ្ហាផ្នែកសូហ្វ៊ែរ iOS នៅតែអាចលេចឡើងចំណុចខុសឆ្គងដោយការធ្វេសប្រហែស។ ជាក់ស្ដែង ទូរស័ព្ទ iPhone ដែលបានធ្វើបច្ចុប្បន្នប្រព័ន្ធឡើងទៅ iOS 10 (មិនថា iPhone 6/ 6 Plus, 6s / 6s Plus ) គឺសុទ្ធតែជួបបញ្ហាគាំង។ នេះក៏ជាចំណុចមួយទៀត ដែលលោក Jobs អាចមិនពេញចិត្តឡើយ ប្រសិនលោកនៅបន្តគ្រប់គ្រង Apple ដល់បច្ចុប្បន្ននោះ ព្រោះវាអាចប៉ះពាល់ដល់សេចក្ដី ទុកចិត្តរបស់អតិថិជនមកលើក្រុមហ៊ុនបាន៕
ប្រែសម្រួល៖ រឹទ្ធិរាជ
ប្រភព៖ cultofmac
