ចំណុច៤យ៉ាងដែលសំខាន់បំផុតក្នុងជីវិតរបស់មនុស្ស
អតីតតារាសម្តែងដ៏ល្បីរបស់អង់គ្លេស គឺលោកស្រី Audrey Helburn បាននិយាយថា៖«អ្វីដែលសំខាន់បំផុតក្នុងជីវិតគឺរីករាយនឹងជីវិត»។ ប៉ុន្តែ មនុស្សជាច្រើនធ្វើការងារច្រើនម៉ោងហួសកម្រិត ដែលគ្មានពេលសូម្បីតែដើរលេងឬចំណាយពេលជាមួយមនុស្សដែលខ្លួនស្រឡាញ់ទៅវិញ។ យើងរាល់គ្នាបានក្លាយជាទាសករនៃលុយ ដែលធ្វើឲ្យភ្លេចគិតពីគ្រួសារ សុខភាពឬក្តីសុបិនរបស់យើង។ល។ តើអ្វីដែលពិតជាសំខាន់ជាងគេក្នុងឆាកជីវិត? វាអាស្រ័យទៅលើគំនិតបុគ្គលនោះទេ ប៉ុន្តែចំណុច៤យ៉ាងនេះគឺជាអ្វីដែលអ្នកមិនគួរបំភ្លេច៖
១) សុខភាព៖ ទ្រព្យសម្បត្តិពិតគឺមានសុខភាពល្អ មិនមែនមាសប្រាក់នោះទេ ពីព្រោះថាប្រសិនជាអ្នកឈឹ អ្នកមិនអាចទៅធ្វើការ អ្នកត្រូវចំណាយថវិកាជាច្រើនសម្រាប់ការព្យាបាល។ ផ្ទុយទៅវិញ ប្រសិនជាអ្នកមានសុខភាពល្អ អ្នកមិនចាំបាច់អស់លុយ លើសពីនេះទៅទៀត អ្នកអាចរកចំណូលថែមទៀតផង។
២) ទំនាក់ទំនង៖ ក្តីស្រឡាញ់គឺជាអ្វីដែលមានតម្លៃបំផុត ពីព្រោះថាលុយមិនអាចទិញក្តីស្រឡាញ់បានទេ។ មនុស្សយើងមិនអាចរស់នៅដោយគ្មានក្តីស្រឡាញ់បានទេ យើងត្រូវការក្តីស្រឡាញ់និងត្រូវផ្តល់ក្តីស្រឡាញ់ទៅកាន់អ្នកដទៃដូចគ្នា។ ប្រសិនជាអ្នករវល់តែរកលុយ ទំនាក់ទំនងជាមួយគ្រួសារឬសង្សារអាចនឹងមានការប៉ះពាល់។
៣) គិតវិជ្ជមាន៖ លោក Robert T.Kiyosaki ធ្លាប់និយាយថា៖« វាមិនមែនជាអ្វីដែលអ្នកនិយាយចេញពីមាត់ដែលសំខាន់នោះទេ អ្វីដែលសំខាន់គឺការគិតដែលអ្នកប្រាប់ខ្លួនឯង»។ ប្រសិនជាយើងគ្មានការគិតវិជ្ជមានទេ យើងនឹងប្រៀបធៀបជីវិតខ្លួនឯងទៅនឹងអ្នកដទៃ ដែលធ្វើឲ្យខ្លួនឯងមិនពេញចិត្តនឹងជីវិតដែលខ្លួនមាន។ ការគិតវិជ្ជមានគឺជាការទទួលយកខ្លួនឯងនិងធ្វើការផ្លាស់ប្តូរដើម្បីភាពល្អប្រសើរ។
៤) កុំភ្លេចពីក្តីសុបិន និង គុណតម្លៃរបស់ខ្លួនឯង៖ ជីវិតរបស់យើងគឺខ្លីណាស់ ដូច្នេះហើយកុំខ្ជះខ្ជាយពេលវេលាទៅលើអ្វីដែលមិនត្រូវនឹងក្តីសុបិន គុណតម្លៃឬគោលបំណងរបស់ខ្លួនឯង។ ប្រសិនជាអ្នកត្រូវធ្វើអ្វីមួយ ចាប់ផ្តើមនូវថ្ងៃនេះ៕
ប្រែសម្រួល៖ អុឹងមុយយូ ប្រភព៖ www.lifehack.org
