RAM ​ដែល​ត្រូវ​គេ​ចំណាំ​ហៅ​ថា ជា​មេម៉ូរី​បណ្ដោះអាសន្ន​នោះ គឺ​ជា​​ផ្នែក​ដ៏​សំខាន់​មួយ​នៃ​កុំព្យូទ័រ​សមត្ថភាព​ខ្ពស់។ កុំព្យូទ័រ​មួយ​ត្រូវ​បាន​ចាត់​ទុក​ថា មាន​សមត្ថភាព​ខ្ពស់ ឬ​មិន​ខ្ពស់​គឺ​អាស្រ័យ​លើ​ផ្នែក​សំខាន់ៗ​ដូច​ជា អង្គ​ប្រតិបត្តិ (CPU), ក្រាហ្វិក (VGA) ​ហើយ​ក៏​ដូច​ជា RAM ​ក៏​សំខាន់​មិន​អាច​ខ្វះ​បាន។ បើ​តាម​របាយការណ៍​ថ្មី​នេះ អះអាង​ថា ​នឹង​មាន DDR RAM ​ជំនាន់​ថ្មី​ត្រូវ​បាន​ផលិត​សម្រាប់​បង្កើន​ល្បឿន​កុំព្យូទ័រ​ឱ្យ​រឹតតែ​លឿន​ទ្វេដង ប្រៀបធៀប​នឹង RAM បច្ចុប្បន្ន។

​ផ្អែកតាម​គេហទំព័រ engadget ឱ្យ​ដឹង​ថា អង្គការ JEDEC ​ដែល​ជា​អ្នក​កំណត់​ស្តង់ដារ​សម្រាប់​ឧស្សាហកម្ម មៃក្រូ​អេឡិត្រូនិក (microelectronics) ​បាន​លើកឡើង​ថា ពេល​នេះ ពួក​គេ​កំពុង​ធ្វើការ​ឌីហ្សាញ DDR RAM ជំនាន់​ថ្មី​គឺ DDR5 និង NVIDMM-P ដែល​មាន​សមត្ថភាព​ខ្ពស់​អស្ចារ្យ​ជាង RAM បច្ចុប្បន្ន។ RAM ថ្មី​នេះ នឹង​ជួយ​បន្ថែម​សមត្ថភាព​កុំព្យូទ័រ​ឱ្យ​មាន​ល្បឿន​កើនឡើង​ទ្វេ​ដង​ជាង RAM បច្ចុប្បន្ន សម្រាប់​ផ្គត់ផ្គង់​ឧស្សាហកម្ម Gaming Laptop។ ក្រៅពី​ជួយ​បង្កើន​ល្បឿន​ដំណើរការ​កុំព្យូទ័រ​ហើយ​នោះ RAM DDR5 ជំនាន់​ថ្មី ក៏​ត្រូវ​បាន​ឌីហ្សាញ កាត់បន្ថយ​ការ​ចំណាយ​លើ​ថាមពល​ផ្គត់ផ្គង់​ម៉ាស៊ីន​ផង​ដែរ។ JEDEC មាន​គម្រោង​នឹង​បញ្ចេញ​ស្តង់ដារ RAM ថ្មី​ក្នុង​ពេល​ណាមួយ​នៅ​ឆ្នាំ២០១៨ ក្រោយ ដែល​ជា​ជំនាន់ DDR5 RAM៕   ប្រែ​សម្រួល៖ រឹទ្ធិរាជ ប្រភព៖ engadget