ក្រុមហ៊ុន Apple ​មាន​ចចាមអារ៉ាម​ជា​យូរ​មក​ហើយ​ថា នឹង​ទិញ​បន្ទះ​អេក្រង់​ប្រភេទ OLED ​ដែល​ផលិត​ដោយ​ក្រុមហ៊ុន Samsung ដើម្បី​យក​ទៅ​បំពាក់​នៅ​លើ​កំពូល​ទូរស័ព្ទ iPhone ជំនាន់​ថ្មី​របស់​ខ្លួន​ដែល​នឹង​ចេញ​នៅ​ចុង​ឆ្នាំ២០១៧ នេះ។ ហើយ​ថ្ងៃ​នេះ របាយការណ៍​ថ្មី​គេហទំព័រ http://asia.nikkei.com បាន​អះអាង​ដូច​គ្នា​នេះ​ដែរ។

យោងតាម​គេហទំព័រ Nikkei ​ឱ្យ​ដឹង​ថា ខណៈ​ពេល​នេះ ក្រុមហ៊ុន Apple បាន​ធ្វើការ​បញ្ជា​ទិញ​អេក្រង់​កោង​ប្រភេទ OLED ប្រមាណ ៧០លាន​បន្ទះ​ពី​ក្រុមហ៊ុន Samsung ហើយ​ក៏​មាន​តែ​ដៃគូ​មួយ​នេះ​ប៉ុណ្ណោះ សម្រាប់​ផ្គត់ផ្គង់​អេក្រង់​ដល់ Apple ក្នុង​ឆ្នាំ២០១៧​នេះ។ អេក្រង់​ទាំង​នោះ នឹង​ត្រូវ​ប្រើប្រាស់​នៅ​លើ iPhone 8 ​ដែល​ជា​ទាយាទ​ថ្មី​របស់ iPhone 7 និង 7 Plus។ នៅ​មាន​ការ​រំពឹង​ទៀត​ថា ឆ្នាំ​នេះ Apple អាច​នឹង​បញ្ចេញ iPhone ថ្មី​ម្ដង ៣ម៉ូដែល។ ក្រៅពី​ម៉ូដែល iPhone 8 ប្រើ​អេក្រង់​កោង OLED ​ដែល​គេ​រំពឹង​ថា នឹង​មាន​អេក្រង់​ទំហំ ៥,២អ៊ីញ​នោះ ចំណែក​ពីរ​ម៉ូដែល​ទៀត អាច​នៅ​រក្សា​ទំហំ​ដដែល ដូច​នៅ​លើ iPhone 7 និង 7 Plus គឺ​ទំហំ ៤,៧អ៊ីញ និង ៥,៥អ៊ីញ ប្រភេទ​ក៏​ដូច​គ្នា​គឺ LCD។ iPhone 8 ប្រើ​អេក្រង់​កោង OLED ទំហំ ៥,២អ៊ីញ ត្រូវ​គេ​រំពឹង​ថា អាច​មាន​តម្លៃ​ដល់ ១០០០ដុល្លារ (តម្លៃ​ចេញ​ពី​ក្រុមហ៊ុន)។ អ្នក​វិភាគ​ខ្លះ កំពុង​រំពឹង​ដែរ​ថា Apple នឹង​ចែកចាយ​លក់ iPhone 8 ប្រមាណ ៥៥លាន​គ្រឿង ដែល​ជា​បរិមាណ​ដ៏​ច្រើន ជួយ​ឱ្យ Apple បំបែក​កំណត់​ត្រា​ថ្មី​បាន៕ ប្រែ​សម្រួល៖ រឹទ្ធិរាជ ប្រភព៖ asia.nikkei.com