បណ្ដាញសង្គមអាចនិយាយបានថា ជាវេទិកាពិភាក្សាដ៏ទូលាយ ងាយស្រួលទាក់ទង និងចែកចាយព័ត៌មានគ្នាយ៉ាងរហ័ស។ បណ្ដាប្រទេសនានា អាចមានស្ថានភាពនយោបាយប្រទេសផ្សេងៗគ្នា ហើយក៏មានការទិតៀន និងការរិះគន់ផ្សេងៗធ្វើឡើងជានិច្ចការផងដែរ។ ទន្ទឹមនោះ ក៏មានមេដឹកនាំនយោបាយតាមបណ្ដាប្រទេសមួយចំនួន មិនអនុញ្ញាតឱ្យប្រជាជនរបស់ខ្លួនប្រើប្រាស់បណ្ដាញទំនាក់ទំនងសង្គមឡើយ ដោយសារមូលហេតុផ្សេងៗគ្នា។
ខាងក្រោមនេះគឺជារបាយការណ៍ស្ដីពីបណ្ដាប្រទេសពិភពលោកចំនួន៦ ដែលបានបិទ (block) បណ្ដាញទំនាក់ទំនងសង្គម Facebook មិនឱ្យប្រជាជនខ្លួន ភ្ជាប់ប្រើបានឡើយ។ ប្រទេសខ្លះ បានបិទទាំង Twitter ព្រមទាំង Youtube ថែមទៀត មិនត្រឹមតែ Facebook នោះទេ។
១) កូរ៉េខាងជើង
ប្រហែលប្រទេសមានការសម្ងាត់ដែលត្រូវលាក់បាំងបំផុតនោះ អាចជាដែនដីប្រទេសកូរ៉េខាងជើងរបស់លោកគីមជុងអ៊ុនក៏ថាបាន។ ជាក់ស្ដែងសូម្បីតែប្រព័ន្ធ 3G ថ្មីដែលដំឡើងសម្រាប់ភ្ញៀវបរទេសក៏មានការបំបិទ ក្នុងបរិមាណកំណត់ដែលអាចប្រើបានប៉ុណ្ណោះ។ ហើយប្រទេសកុម្មុយនិស្តមួយនេះ ក៏បានប្លុក ឬបិទ ការប្រើបណ្ដាញសង្គម Facebook, Twitter និង YouTube មិនអនុញ្ញាតឱ្យប្រជាជនខ្លួនភ្ជាប់ចូលបាននោះឡើយ។
កូរ៉េខាងជើងបានប្រកាសផ្លូវការ ធ្វើការបិទ (block) បណ្ដាញសង្គម Facebook, YouTube ក៏ដូចជា Twitter នៅក្នុងខេមេសា ឆ្នាំ២០១៦ កន្លងទៅ។
២) អ៊ីរ៉ង់
អ៊ីរ៉ង់បានបិទ (block) បណ្ដាញសង្គមទាំង៣ នេះតាំងពីឆ្នាំ២០០៩ គឺក្រោយមានភាពចម្រូងចម្រាសក្នុងអំឡុងពេលបោះឆ្នោតប្រធានាធិបតី។
៣) ចិន
Facebook ត្រូវបានហាមឃាត់មិនឱ្យប្រើ ឬហៅថាប្លុក ក្នុងប្រទេសចិន តាំងពីឆ្នាំ២០០៩ ជាឆ្នាំតែមួយដែលប្រទេសកុម្មុយនិស្តនេះក៏បានបិទ Twitter ដូចគ្នា។ ចំណែកបណ្ដាញចែករំលែកវីដេអូអនឡាញ YouTube ត្រូវបានប្លុក (block) ពីប្រទេសចិន ក្នុងឆ្នាំ២០១២ ដំណាលគ្នានឹង អ៊ីរ៉ង់, ប៉ាគីស្ថាន, ស៊ីរី , Turkmenistan និងស្ទើរតែប្លុកចោលទាំងស្រុងនៅអាល្លឺម៉ង់ទៀតផង។
៤) គុយបា
ទោះបី Facebook មិនទាន់ត្រូវបានបិទ (block) ក្នុងប្រទេសគុយបាក៏ដោយ ប៉ុន្តែវាច្បាស់ណាស់ ចំពោះការភ្ជាប់ចូលទៅកាន់បណ្ដាញសង្គមយក្សនេះ គឺមានការលំបាក។ ចំណែកបណ្ដាញសង្គម Twitter ក៏ដូចគ្នា ទោះមិនមែនប្លុក តែក៏មិនងាយស្រួលភ្ជាប់ដែរ។ ដោយសារ YouTube គឺត្រូវបានហាមឃាត់។
៥) បង់ក្លាដែស
រដ្ឋាភិបាល បញ្ជាឱ្យធ្វើការបិទមិនឱ្យភ្ជាប់ប្រើ Facebook, WhatsApp និង Viber នៅចុងឆ្នាំ២០១៥។
ក្រៅពីនេះ នៅមាន អេហ្ស៊ីប, ស៊ីរី, ម៉ូរីស, ប៉ាគីស្ថាន និងចុងក្រោយគឺ វៀតណាម ដែលជាបណ្ដាប្រទេស បាន block បណ្ដាញសង្គម មិនឱ្យប្រជាជនខ្លួនប្រើប្រាស់ឡើយ។ បើតាមសារព័ត៌មាន indexoncensorship ចុះផ្សាយកន្លងទៅឱ្យដឹងថា វៀតណាមជាប្រទេសជាប់លេខរៀងទី១០ ក្នុងចំណោមបណ្ដាប្រទេសដែលហាមឃាត់មិនឱ្យប្រជាជនប្រើ Facebook។
ទោះជាយ៉ាងណា ចំពោះជនដែលមានចំណេះដឹងផ្នែកព័ត៌មានវិទ្យា ក៏នៅតែមានវិធីសាស្ត្រផ្សេងៗក្នុងការលួចប្រើបណ្ដាញសង្គមទាំងនោះដដែល៕
ដោយ៖ រឹទ្ធិរាជ
ប្រភព៖ rednewswire
