របាយការណ៍​មួយ​ចំនួន​បាន​លើកឡើង​ថា Apple និង Samsung បាន​ត្រូវរ៉ូវ​គ្នា​លើ​កិច្ចព្រមព្រៀង​សហការ​រយៈពេល ២ឆ្នាំ ក្នុង​នាម​ជា​អ្នក​ជួល និង​ផ្គត់ផ្គង់​លើ​បន្ទះ​អេក្រង់ OLED។ ក្នុង​កិច្ច​ព្រមព្រៀង​គ្នា​នេះ Apple នឹង​ប្រើ​ទុន​ប្រមាណ ២ពាន់​លាន​ដុល្លារ​អាមេរិក សម្រាប់​ឱ្យ​ក្រុមហ៊ុន Samsung ផ្គត់ផ្គង់​អេក្រង់​ប្រភេទ​នេះ​ដល់​ខ្លួន ដើម្បី​យក​ទៅ​បំពាក់​លើ iPhone ក្រោយៗ អាច​ចាប់ផ្ដើម​ពី iPhone 8 ឆ្នាំ​នេះ​តែម្ដង។

ផ្អែក​តាម​ប្រព័ន្ធ​ផ្សព្វផ្សាយ​ព័ត៌មាន​អនឡាញ​ដូច​ជា Chosun Biz, ET News និង DiggTimes បាន​ឱ្យ​ដឹង​ថា ដំណាក់កាល​ដំបូង​នៃ​កិច្ចព្រមព្រៀង​រវាង​ក្រុមហ៊ុន​អេឡិចត្រូនិក​យក្ស​ទាំងពីរ Apple ត្រូវ​ការ​ការ​ផ្គត់ផ្គង់​បន្ទះ​អេក្រង់ OLED ​ប្រមាណ​ពី ៧០ ទៅ ៩២លាន​អេក្រង់ ដើម្បី​បំពេញ​ចង្វាក់​ផលិតកម្ម​ឧបករណ៍​អេឡិចត្រូនិក​ចល័ត​របស់​ខ្លួន សម្រាប់​តែ​ឆ្នាំ២០១៧ នេះ។ យោងតាម​ប្រភព​ដដែល អះអាង​ទៀត​ថា ក្នុង​គម្រោង​ផ្គត់ផ្គង់​បរិមាណ​អេក្រង់​ដ៏​ច្រើន​នេះ តម្រូវ​ឱ្យ Samsung ​ត្រូវ​ចំណាយ​ទុន​ប្រមាណ​ដល់ ៩ពាន់​លាន​ដុល្លារ​សម្រាប់​ចង្វាក់​ផលិតកម្ម ដែល​អាច​ត្រៀម​សម្រាប់​ការ​កុម្ម៉ង់​ពី Apple ដល់​ទៅ ៧០លាន​អេក្រង់​កោង (curved display)។ ប្រសិន​បរិមាណ​ទាំង​នេះ ពិត​ជា​ត្រឹមត្រូវ​មែន នោះ​មាន​ន័យ​ថា ប្រហែល ៤០% នៃ​ការ​ចែកចាយ​ទូរស័ព្ទ iPhone ​ក្នុង​ឆ្នាំ២០១៧ ​នឹង បំពាក់​មក​ជាមួយ​ប្រភេទ​អេក្រង់ OLED របស់ Samsung៕ ប្រែ​សម្រួល៖ រឹទ្ធិរាជ ប្រភព៖ DigiTimes