អាច​ជា​ដំណឹង​ថ្មី​មួយ​គួរ​ឱ្យ​ចាប់អារម្មណ៍​ដល់​មហាជន ដែល​កំពុង​តាមដាន​ព័ត៌មាន​អំពី​កំពូល​ទូរស័ព្ទ iPhone 8។ ទើបតែ​ថ្មីៗ​នេះ មាន​បែកធ្លាយ​រូបរាង​ឌីហ្សាញ iPhone 8 ចេញ​ពី​​អ្នក​នៅ​ក្នុង​រោងចក្រ Foxconn ដែល​ជា​ដៃគូ​សហការ​ដំឡើង​ផលិតផល iDevice របស់ Apple។ ប្រភព​បាន​បញ្ជាក់​ថា នេះ​ជា​រចនាបថ​ឌីហ្សាញ​ចុងក្រោយ​នៃ​ម៉ូដែល iPhone ជំនាន់​ទី១០ គឺ iPhone 8។ ដ្យាក្រាម បាន​បង្ហាញ​ឱ្យ​ឃើញ នូវ iPhone ​អេក្រង់​ធំ​ជាង​មុន មិន​ធ្លាប់​មាន​គឺ ទំហំ ៥,៨អ៊ីញ​ប្រភេទ OLED ​និង​ជា​អេក្រង់ 2.5D មាន​លក្ខណៈ​ទាល​ឃុប​ចុះ​បន្តិច​នៅ​ផ្នែក​គែម​គ្រប់​ជ្រុង​នៃ​អេក្រង់។

ជា​ទូទៅ​មុន​នឹង​ឈាន​ដល់​ការ​ប្រកាស​ចេញ​ស្មាតហ្វូន​កំពូលៗ​របស់​បណ្ដា​ក្រុមហ៊ុន​ទូរស័ព្ទ​ល្បីៗ គឺ​សុទ្ធតែ​មាន​ផ្សាយ​ចេញ​ដំណឹង អំពី​លក្ខណៈ​សម្បត្តិ ក៏​ដូច​ជា​រូបរាង​ជា​មុន។ ជាក់ស្ដែង iPhone ជំនាន់​ថ្មី​របស់ Apple ពេល​នេះ​កំពុង​ត្រូវ​មហាជន​ចោល​ក្រសែ​ភ្នែក តាមដាន​យ៉ាង​ជាប់​ស្អិត ដោយ​ក្ដី​រំពឹង​ថា iPhone 8 នឹង​ជា​កំពូល​ស្មាតហ្វូន​ទំនើប​បំផុត​មួយ ចេញ​មក​ប្រកួតប្រជែង​ទីផ្សារ​ស្មាតហ្វូន​ទំនើបៗ​ឆ្នាំ២០១៧ នេះ។ សរុប​មក រចនាបថ​ទូរស័ព្ទ iPhone គឺ​មាន​ការ​ផ្លាស់ប្ដូរ​អស់ ៣ដង មក​ហើយ​គឺ​រាប់​ចាប់​ពី iPhone 3GS ឡើង​ទៅ iPhone 4, ពី iPhone 4s ឡើង​ទៅ iPhone 5 និង​ពី iPhone 5s ឡើង​ទៅ iPhone 6។ ហើយ​ដំណឹង​បែក​ធ្លាយ ដែល​គួរ​ឱ្យ​ទុក​ចិត្ត​ភាគច្រើន គឺ​ត្រូវ​ទម្លាយ​ដោយ​ប្រភព​រោងចក្រ Foxconn ដែល​ជា​ដៃគូ​សហការ​របស់ Apple។

បើ​តាម​ការ​អះអាង​មុន ដោយ​អ្នក​វិភាគ​ល្បី​ឈ្មោះ​លោក Ming-Chi Kuo ​ឱ្យ​ដឹង​ថា កាមេរ៉ា​មុខ​នៅ​លើ iPhone 8 ​នឹង​ត្រូវ​ច្របាច់​បញ្ចូល​បច្ចេកវិទ្យា 3D scanner ជាមួយ​សមត្ថភាព​អាច​សម្គាល់​ផ្ទៃ​មុខ face recognition។ ក្រុមហ៊ុន Apple ​បាន​កំពុង​បញ្ចូល​មុខងារ និង​បច្ចេកវិទ្យា​ថ្មីៗ​នេះ ទៅ​លើ iPhone 8 ដែល​ជា​ហេតុ​នាំ​ឱ្យ​ចង្វាក់​ផលិតកម្ម អាច​ត្រូវ​ពន្យារ​ពេល​បន្តិច។

យោងតាម​ប្រភព​ដដែល​នេះ ឱ្យ​ដឹង​ទៀត​ថា ប៊ូតុង Home នឹង​ពុំ​ជា​ប៊ូតុង​មាន​រាង​ច្បាស់ៗ ហើយ​មិន​អាច​ចុច​សង្កត់​ចុះ​ក្រោម ដូច​នៅ​លើ iPhone ជំនាន់​មុនៗ​ទៀត​ឡើយ។ រីឯ​ប៊ូតុង Power ​នឹង​បញ្ចូល​មុខងារ អាច​ធ្វើ​កិច្ចការ​បាន​ពីរ​យ៉ាង​ផ្សេង​គ្នា ហើយ Touch ID នឹង​ត្រូវ​បង្កប់​នៅ​ពី​ក្រោយ​អេក្រង់។ បើ​តាម​ចចាមអារ៉ាម​ថ្មីៗ​នេះ អម​ជាមួយ​រូប​គំនូសតាង iPhone ជំនាន់​ក្រោយ ឃើញ​ថា iPhone 8 នឹង​បំពាក់​មក​ជាមួយ​កាមេរ៉ា​ភ្លោះ (dual camera) ​នៅ​ខាង​ក្រោយ ប៉ុន្តែ​មាន​ទម្រង់​បញ្ឈរ គឺ​មិន​ផ្ដេក​ដូច​នៅ​លើ iPhone 7 Plus នោះ​ទេ៕ ប្រែ​សម្រួល៖ រឹទ្ធិរាជ ប្រភព៖ phonearena