ក្រុមហ៊ុន Lenovo ​បាន​បន្ថែម​កុំព្យូទ័រ​ប្រភេទ Chromebook ទៅ​ក្នុង​ត្រកូល Lenovo Flex គឺ Flex 11 Chromebook ​ដែល​ភ្ជាប់​មក​ជាមួយ​អេក្រង់​ទំហំ ១១,៦អ៊ីញ។ អេក្រង់ ១១,៦អ៊ីញ​នៅ​លើ Lenovo Flex 11 Chromebook អាច​បង្ហាញ resolution កម្រិត 1366x768px ​ហើយ​បំពាក់​ដោយ​អង្គ​ប្រតិបត្តិ Quad-Core ល្បឿន 2.1GHz។

កុំព្យូទ័រ Flex 11 ​ថ្មី​របស់​ក្រុមហ៊ុន​អេឡិចត្រូនិក​ខ្នាត​ធំ មាន​ស្នាក់ការ​កណ្ដាល​ពីរ​កន្លែង (នៅ​ចិន និង​អាមេរិក) នេះ ត្រូវ​បាន​ឌីហ្សាញ​រូបរាង អាច​បត់​បាន​ក្នុង​មុំ ៣៦០ដឺក្រេ ហើយ​ក៏​ធន់​នឹង​ការ​ធ្លាក់ ដោយ​ក្រុមហ៊ុន​បាន​ប្រសិទ្ធិនាម​ថា កុំព្យូទ័រ​ធ្លាក់​មិន​ខូច ក្នុង​រយៈ​កម្ពស់ ៧៥សង់ទីម៉ែត្រ។ Keyboard ​នៅ​លើ Flex 11 មិន​ចូល​ទឹក ដែល​អាច​ធន់​នឹង​សម្ពាធ​ទឹក ៣៣០មីលីលីត្រ (ប្រហែល​ចំណុះ​ទឹក ១ពែង)។ លក្ខណៈ​សម្បត្តិ​ផ្សេង​ទៀត​នៅ​លើ Lenovo Flex 11 Chromebook គឺ​បាន​ភ្ជាប់​មក​ជាមួយ​អង្គ​ផ្ទុក​ទិន្នន័យ​ទំហំ 32GB ​អាច​បន្ថែម​កាត​មេម៉ូរី SD, មាន Wi-Fi, Bluetooth និង USB Type C។ កុំព្យូទ័រ Chromebook ថ្មី Flex 11 នេះ​នឹង​មាន​លក់​លើ​ទីផ្សារ​អាមេរិក ចាប់ពី​ចុង​ខែ​មេសា​នេះ ជាមួយ​តម្លៃ​ប្រហែល ២៧៩ដុល្លារ​ប៉ុណ្ណោះ៕ ប្រែ​សម្រួល៖ រឹទ្ធិរាជ ប្រភព៖ cnet