ក្រុមហ៊ុន Apple និង Nike ថ្មីៗនេះបានចាប់ដៃសហការគ្នាផលិតចេញនាឡិកា Apple Watch ម៉ូដែលថ្មីមួយទៀត ក្រោមឈ្មោះថា Apple Watch NikeLab យ៉ាងទំនើប ទាន់សម័យបែបស្ពត។ Apple Watch NikeLab ប្រាកដថា គឺមានរូបរាងបែប Sport ព្រោះ ជាសមិទ្ធផលក្រោមការសហការគ្នារវាង Apple និង Nike ដែលជាក្រុមហ៊ុនឯកទេសផលិតសម្ភារៈកីឡាស្រាប់។
ម៉ូដែលនាឡិកា NikeLab សមិទ្ធផលថ្មីរវាងក្រុមហ៊ុនអាមេរិកល្បីឈ្មោះទាំងពីរនេះ គឺជាជំនាន់នាឡិកា limited edition ដែលមានលក់ជាមួយប្រវែងខ្សែពីរជម្រើសគឺ ៣៨មិល្លីម៉ែត្រ និង ៤២មិល្លីម៉ែត្រ។
ជំនាន់ limited edition នៃ Apple Watch NikeLab នេះ គឺបានបំពាក់នូវមុខងារល្អប្រើ ទំនើបៗ ដូចជា Apple Watch ជំនាន់បច្ចុប្បន្នដែរ គ្រាន់តែម៉ូដែលថ្មីនេះ ត្រូវបានច្របាច់បញ្ចូលស្រាប់ដោយកម្មវិធី Nike+ Run Club app, ពាក្យបញ្ជា Siri ពិសេសៗ, GPS, អេក្រង់ភ្លឺជាងមុន ២ដង, មានបច្ចេកវិទ្យាមិនជ្រាបទឹកធន់បានជម្រៅ ៥០ម៉ែត្រ ហើយបំពាក់ដោយអង្គប្រតិបត្តិសមត្ថភាពខ្ពស់ dual-core processor និងដំណើរការដោយប្រព័ន្ធប្រតិបត្តិការ watchOS 3។
នាឡិកាឆ្លាតវៃដែលមានការរួមដៃពីក្រុមហ៊ុនសម្ភារៈកីឡា Apple Watch NikeLab នេះ នឹងមានលក់លើទីផ្សារចាប់ពីថ្ងៃទី២៧ ខែមេសានេះតទៅ ប៉ុន្តែមិនទាន់ត្រូវបានបញ្ជាក់តម្លៃនៅឡើយ៕
ប្រែសម្រួល៖ រឹទ្ធិរាជ
ប្រភព៖ Nike
