ផ្អែក​តាម​របាយការណ៍​ពី​ក្រុមហ៊ុន​វិភាគ​ទីផ្សារ IHS Markit បាន​ឱ្យ​ដឹង​ថា កំពូល​ស្មាតហ្វូន Galaxy S8 របស់ Samsung ត្រូវ​ក្រុមហ៊ុន​កូរ៉េ​នេះ ​ចំណាយ​ថ្លៃ​ដើម​ផលិត​អស់ ៣០១,៦ដុល្លារ។ ចំពោះ​តម្លៃ​លក់​រាយ​ Galaxy S8 ក្នុង​ប្រទេស​កម្ពុជា ១គ្រឿង​អាច​មាន​តម្លៃ​ប្រហែល ៧៣៩ដុល្លារ ខណៈ S8 Plus តម្លៃ ៨១៩ដុល្លារ។

ងាក​ទៅ​មើល​ទីផ្សារ​វៀតណាម Galaxy S8 ត្រូវ​គេ​រាយការណ៍​ថា អាច​មាន​លក់​នៅ​ក្នុង​តម្លៃ ១៨លាន​ដុង ឬ​ប្រហែល ៨៤០ដុល្លារ រីឯ S8+ អាច​ឈាន​ដល់ ២១លាន​ដុង ឬ​ប្រហែល ៩២៥ដុល្លារ។ នេះ​បើ​ផ្អែក​សារព័ត៌មាន vnexpress។

ប្រធាន​ជាន់​ខ្ពស់​ផ្នែក​វាយតម្លៃ​សេវា benchmarking service នៅ IHS Markit បាន​លើកឡើង​ថា ផ្នែក​នាំ​ឱ្យ S8 ​កើនឡើង​ថ្លៃ​ដើម​ផលិត គឺ​ទំហំ​អង្គ​ចងចាំ (ROM) ក៏​ដូច​ជា Hardware ដើម្បី​គាំទ្រ​មុខងារ​ថ្មីៗ​ដែល​មិន​មាន​ស្មាតហ្វូន​ណា​មាន​ដូច ជាក់ស្ដែង​ផ្នែក​ដែល​គាំទ្រ​មុខងារ Bixby តែម្ដង។

សូម​បញ្ជាក់​ថា Galaxy S8 ទាំង​ពីរ​ម៉ូដែល​ត្រូវ​បាន​ដាក់​ឱ្យ​បញ្ជា​ទិញ (Pre-Order) នៅ​ទីផ្សារ​ប្រទេស​កម្ពុជា​ចាប់តាំង​ពី​ថ្ងៃ​ទី០៨ មេសា​កន្លង​ទៅ។ ក្រុមហ៊ុន Samsung ប្រចាំ​នៅ​កម្ពុជា នឹង​រៀបចំ​ព្រឹត្តិការណ៍​ដាក់​ឱ្យ​ចរាចរ​លក់ S8 នៅ​ថ្ងៃ​ទី៤ ឧសភា​ខាង​មុខ នៅ​មហោស្រព​ចេនឡា ហើយ​នឹង​ដាក់​លក់​ទូទាំង​ប្រទេស​នៅ​ថ្ងៃ​ទី ៧ ខែ​ឧសភា ឆ្នាំ ២០១៧៕ ប្រែ​សម្រួល៖ រឹទ្ធិរាជ ប្រភព៖ Business Wire