ជា​រឿង​ធម្មតា​ទៅ​ហើយ ដែល​តែងតែ​មាន​ការ​ផ្សាយ​ចេញ​នូវ​ដំណឹង​ជុំវិញ​​ស្មាតហ្វូន​ស៊េរី​ថ្មីៗ ហើយ​ពេល​នេះ iPhone 8 គឺ​ជា​ប្រធានបទ​ដែល​សាធារណជន​មាន​ការ​ចាប់អារម្មណ៍​ខ្លាំង ចង់​ដឹង​ទាំង​ទំហំ ទាំង​លក្ខណៈ​សម្បត្តិ កម្រាស់ ហើយ​ថា តើ​ដំណើរការ​លឿន​ជាង​មុន​កម្រិត​ណា។ ចំណែក​រូប​ប៉ុន្មាន​សន្លឹក​ចុងក្រោយ​នេះ ទើប​ត្រូវ​បាន​គេ​បង្ហោះ​នៅ​លើ Twitter ជាមួយ​ការ​អះអាង​ថា ជា iPhone 8 ​ហាក់​គ្មាន​គែម​អេក្រង់​សល់ ក៏​ដូច​ជា​គ្មាន Touch ID Sensor ដូច​ចចាមអារ៉ាម​ធ្លាប់​លើកឡើង​នោះ​ឡើយ។

គណនី Benjamin Geskin ​បាន​បង្ហោះ​រូប​ប៉ុន្មាន​សន្លឹក​នេះ នៅ​លើ​បណ្ដាញ​សង្គម twitter ហើយ​រោងចក្រ Foxconn ត្រូវ​គេ​រាយការណ៍​ថា បាន​ទទួល​ស្គាល់​រូប​ទាំង​នោះ​ថា ពិត​ជា​តួ​ទូរស័ព្ទ iPhone 8 មែន។ បើ​តាម​ចចាមអារ៉ាម​មុនៗ​ធ្លាប់​បាន​លើកឡើង​ថា iPhone 8 នឹង​ជា​ទូរស័ព្ទ​មាន​គែម​ស្ដើង​ទំនើប ហើយ​ប្រើ​អេក្រង់​មុខ មាន​សណ្ឋាន​កោង​ឃុប​បន្តិច​នៅ​ផ្នែក​ខាង (edge-to-edge)។ ពុំ​មាន​សញ្ញាណ​ថ្មី​អំពី​មុខងារ​ស្កេន​ក្រយៅដៃ​ថា នឹង​បំពាក់​នៅ​ខាង​ក្រោយ ឬ​ខាង​មុខ​ឡើយ បើ​គ្រាន់តែ​ផ្អែក​តាម​រូប​លេច​ចេញ​ខាង​លើ គ្រាន់តែ​មាន​ការ​រំពឹង​ថា Apple នឹង​បង្កប់​នៅ​ក្រោម​អេក្រង់​មុខ។

ងាក​ទៅ​មើល​កាមេរ៉ា​ក្រោយ​វិញ រូប​ខាង​លើ​បាន​បង្ហាញ​យ៉ាង​ច្បាស់ គឺ​ជា​ប្រភេទ dual-camera កាមេរ៉ា​ពីរ តែ​តម្រៀប​ជាង​ទម្រង់​បញ្ឈរ (vertical) មិន​មាន​តម្រៀប​ទន្ទឹម​គ្នា​ដូច​នៅ​លើ iPhone 7 Plus នោះ​ទេ។ នៅ​មាន​ការ​កែ​ទម្រង់​ផ្សេង​ទៀត​ដូច​ជា៖ មាន​ការ​ចែក​ដាក់​នូវ​ប៊ូតុង​សំឡេង​ឡើង​ចុះ (+ និង -) នៅ​ផ្នែក​ចំហៀង​ទូរស័ព្ទ និង​មាន​ប៊ូតុង​ដាក់​ស្ងាត់​សំឡេង (mute switch) នៅ​ខាង​លើ។ ផ្នែក​ខាង​ស្ដាំ​វិញ គឺ​មាន​រន្ធ​ស៊ីម​កាត និង​ប៊ូតុង Power ​ដែល​វែង​ជាង​ប៊ូតុង​មាន​នៅ​លើ iPhone ម៉ូដែល​បច្ចុប្បន្ន។ ចំពោះ​កម្រាស់ iPhone 8 ត្រូវ​គេ​រំពឹង​ថា ស្មើ​គ្នា​នឹង​កម្រាស់ iPhone 7 ដែរ គឺ ៧,១មិល្លីម៉ែត្រ ហើយ​ទំហំ​ក៏​ដូច​គ្នា​ផង​ដែរ។

យោងតាម​គេហទំព័រ Bloomberg ថ្មីៗ​នេះ ឱ្យ​ដឹង​ថា ក្រុមហ៊ុន Apple កំពុង​ធ្វើតេស្ត​គំរូ Prototypes ​មួយ​ចំនួន​នៃ iPhone 8។ iPhone 8 នឹង​មាន​មុខងារ 3D គាំទ្រ​លើ​កាមេរ៉ា​មុខ, មាន​បច្ចេកវិទ្យា​សាកថ្ម​លឿន, RAM 3GB ​អេក្រង់ ៥,៨អ៊ីញ OLED កម្រិត​ដង់ស៊ីតេ 521-PPI ហើយ​តម្លៃ​ចេញ​ពី​ក្រុមហ៊ុន​គឺ​មិន​ក្រោម ១០០០ដុល្លារ​ឡើយ៕

​ប្រែ​សម្រួល៖ រឹទ្ធិរាជ ប្រភព៖ techspot