នៅ​ដើម​ខែ​នេះ មាន​សេចក្ដី​រាយការណ៍​អះអាង​នូវ​បញ្ហា​នៅ​លើ Galaxy S8 ដែល​ពាក់ព័ន្ធ​នឹង​អេក្រង់​ទូរស័ព្ទ គឺ​មាន​ស្នាម​ក្រហមព្រឿងៗ​នៅ​លើ​អេក្រង់។ ក្រុមហ៊ុន Samsung បាន​ឆ្កឹះ​យក​បញ្ហា​លើ​អេក្រង់ Galaxy S8 ​លើកឡើង​នៅ​ក្នុង​អំឡុង​សន្និសីទ​ស្ដី​ពី​ប្រាក់​ចំណូល​ប្រចាំ​ត្រីមាស​ក្រុមហ៊ុន និង​បាន​និយាយ​ថា ក្រុមហ៊ុន​បាន​ធ្វើការ​ឆែក​មើល​យ៉ាង​ម៉ត់ចត់​លើ Galaxy S8 ​ហើយ​មាន​ទំនុក​ចិត្ត​ទៅ​លើ​គុណភាព​ស្មាតហ្វូន​ទំនើប​របស់​ខ្លួន។

ចំពោះ​បញ្ហា ក្រុមហ៊ុន​បាន​លើកឡើង​ថា នេះ​ "ជា​លក្ខណៈ​ធម្មតា​នៃ​អេក្រង់ Super AMOLED នោះ​ទេ ដែល​វា​អាច​មាន​ភាព​ខុស​គ្នា នៃ​ការ​បង្ហាញ​ពណ៌​ធម្មជាតិ។ អ្នក​ប្រើ អាច​ធ្វើការ​កំណត់​លក្ខណៈ​ពណ៌​បាន អាស្រ័យ​តាម​ចំណូលចិត្ត​របស់​ពួក​គេ"។ ទោះជា​យ៉ាងណា ក្រុមហ៊ុន​បាន​សន្យា​ថា នឹង​ធ្វើ​បច្ចុប្បន្នភាព​ចំណុច​នេះ លើ​ស្មាតហ្វូន​ជំនាន់​ក្រោយៗ ដែល​ផ្ដល់​ជម្រើស​ឱ្យ​អ្នក​ប្រើ អាច​ធ្វើការ​កំណត់​សភាព​ពណ៌​អេក្រង់​បាន​ល្អ​ជាង​បច្ចុប្បន្ន ទៅ​តាម​ចំណូល​ភ្នែក​របស់​គេ។

អ្នក​ប្រើ​ខ្លះ ក៏​បាន​រាយការណ៍​អំពី​បញ្ហា​ពាក់ព័ន្ធ​នឹង​សមត្ថភាព​សាកថ្ម Wireless ​នៅ​លើ Galaxy S8 ផង​ដែរ ហើយ​បញ្ហា​គឺ​អាច​ពាក់ព័ន្ធ​ទៅ​នឹង​ទ្រនាប់ Wireless Charging Pad ​តែម្ដង ដែល​អ្នក​ខ្លះ​ប្រហែល​ជា​ទិញ​ដុំ​សាក​ឥតខ្សែ​គ្មាន​ម៉ាក​យីហោ​ត្រឹមត្រូវ និង​អន់​គុណភាព។ សូម​បញ្ជាក់​ថា ក្រុមហ៊ុន Samsung នៅ​សប្ដាហ៍​នេះ បាន​ប្រកាស​របាយការណ៍​ប្រាក់​ចំណូល​របស់​ខ្លួន​ប្រចាំ​ត្រីមាស​ទី១ ឆ្នាំ២០១៧ នេះ គឺ​រក​ចំណូល​សរុប​បាន ៤៤,៧ពាន់​លាន​ដុល្លារ​អាមេរិក និង​ចំណេញ​បាន​ច្រើន​បំផុត​គឺ ៨,៨ពាន់​លាន​ដុល្លារ​អាមេរិក។ នេះ​ជា​តួលេខ​ប្រាក់​ចំណេញ​ច្រើន​បំផុត​លើក​ទី២ ក្នុង​ប្រវត្តិសាស្ត្រ​របស់ Samsung រាប់​ចាប់តាំង​ពី​ត្រីមាស​ទី៣ ឆ្នាំ២០១៣ ដែល​ពេល​នោះ​ក្រុមហ៊ុន​អាច​រក​ប្រាក់​ចំណេញ​បាន ៨,៩ពាន់​លាន​ដុល្លារ​អាមេរិក៕ ប្រែ​សម្រួល៖ រឹទ្ធិរាជ ប្រភព៖ GSMArena