ចំណុចសំខាន់ៗដែលមនុស្សមានវ័យខ្ទង់២០ឆ្នាំគួរធ្វើ ដើម្បីកុំឲ្យមានការសោកស្ដាយក្នុងជីវិត
1ជាការពិតណាស់ ក្នុងវ័យ២០ឆ្នាំ មានរឿងជាច្រើនដែលអ្នកគួរតែសាកល្បងយ៉ាងហោចណាស់ឲ្យបានម្តងដែរក្នុងមួយឆាកជីវិតនេះ។ សាកល្បងក្នុងន័យនេះ មានន័យថា សាកល្បងអ្វីដែលល្អៗ ហើយអាចផ្តល់ភាពចម្រុងចម្រើនដល់អ្នក។ប្រសិនជាអ្នកមិនចង់រស់នៅដោយភាពស្ដាយក្រោយទេ ខាងក្រោមនេះគឺជាចំណុចដែលអ្នកគួរមានក្នុងវ័យ២០ឆ្នាំនេះ៖
១) ដើរកម្សាន្តម្នាក់ឯង៖ ជីវិតរាល់ថ្ងៃពោរពេញទៅដោយបញ្ហាដូចជា បញ្ហាការងារ បញ្ហាស្នេហា បញ្ហាគ្រួសារ។ល។ អ្នកគួរតែមានពេលដើរកម្សាន្តខ្លះទាន់ខ្លួននៅក្មេង ហើយអាចយកពេលខ្លះមកបំភ្លេចចោលនូវរឿងដែលស្មុគស្មាញទាំងឡាយបើទោះបីជាវាមានត្រឹមរយៈពេលខ្លី។ លើសពីនេះទៅទៀត ការដែលដើរលេងម្នាក់ឯងក៏អាចជួយអ្នករកឃើញគោលបំណងក្នុងជីវិតផងដែរ។
២) ស្វែងរកខ្លួនឯង( your true self) ៖ ក្នុងវ័យ២០នេះគឺជាពេលវេលាដ៏ល្អបំផុតដែលអ្នកអាចកែប្រែចំណង់ចំណូលចិត្តរបស់អ្នកមកជាអាជីពវិញ។ ស្វែងរកក្តីសុបិន ធ្វើអ្វីដែលអ្នកសប្បាយចិត្ត ហើយកុំគិតថាជីវិតអ្នកសព្វថ្ងៃនេះគឺល្អគ្រប់គ្រាន់ឲ្យសោះ ព្យាយាមបន្ថែមទៀត កែប្រែខ្លួនឯងឲ្យកាន់តែល្អប្រសើរជាងមុន។ ក្នុងការចាប់យកក្តីសុបិនឬសម្រេចក្តីសុបិននេះ អ្នកនឹងស្វែងយល់និងស្គាល់ខ្លួនឯងបានកាន់តែច្បាស់ជាងមុន។
៣) ហ៊ានប្រឈមមុខនឹងការផ្សងព្រេង (risk) ៖ តើរាល់ថ្ងៃនេះអ្នកខំប្រឹងធ្វើការចង់ស្លាប់ចង់រស់ដើម្បីតែរស់ទេឬអ្នកខំប្រឹងធ្វើការដោយសារតែអ្នកពិតជាស្រឡាញ់ការងារមួយនោះ? ប្រសិនជាអ្នកគ្រាន់តែធ្វើការដើម្បីតែលុយមួយមុខនោះទេ អ្នកគួរតែមានភាពក្លាហានក្នុងការបោះបង់ហើយចាប់ផ្តើមស្វែងរកអ្វីមួយដែលពិតជាអាចធ្វើឲ្យជីវិតអ្នកសប្បាយរីករាយជាងមុន។ ចូរចងចាំថា អ្នករស់តែម្តងប៉ុណ្ណោះ ចូរធ្វើអ្វីដែលអ្នករីករាយ។
៤) ត្រូវមានលំនឹងរវាងជីវិតផ្ទាល់ខ្លួន( personal life) និងជីវិតអាជីព( professional life) ៖ ជីវិតរបស់យើងមានតែ២៤ម៉ោងតែប៉ុណ្ណោះក្នុងមួយថ្ងៃ ចូរចំណាយពេលវេលាប្រកបដោយភាពវៃឆ្លាត។ កុំខ្ជះខ្ជាយពេលវេលាឥតប្រយោជន៍ លៃលករកពេលខ្លះសម្រាប់ខ្លួនឯង សម្រាប់ការងារ ហើយសម្រាប់ក្រុមគ្រួសារ។ល។ មិនថាជីវិតផ្ទាល់ខ្លួនឬជីវិតអាជីពនោះទេ វាសុទ្ធតែសំខាន់ដូចគ្នា ដូច្នេះហើយអ្នកត្រូវតែរក្សាលំនឹងឲ្យបានល្អ។
៥) ត្រូវទទួលស្គាល់ថាជីវិតពិតជាលំបាក៖ ឈប់រអ៊ូទៀតទៅ វាមិនអាចផ្លាស់ប្តូរវិញនោះទេ។ ផ្ទុយទៅវិញ អ្នកគួរតែចាប់ផ្ដើមសកម្មភាពណាដែលអាចជួយអ្នកជម្នះនូវបញ្ហា ជួយអ្នកដើរឲ្យដល់គោលដៅវិញប្រសើរជាង។ ។ លើសពីនេះទៅទៀត ដើម្បីជោគជ័យបាន អ្នកគួរតែធ្វើការផ្លាស់ប្តូរ លើកទឹកចិត្តដល់ខ្លួនឯងនិងផ្តល់រង្វាន់ក្រោយអ្នកសម្រេចកិច្ចការណាមួយ៕
ប្រែសម្រួល៖ អឹុង មុយយូ ប្រភព៖ psycho.com
