ក្រុមហ៊ុន Samsung ក៏មានចំណូលចិត្តលើឧស្សាហកម្មរថយន្តបើកបរស្វ័យប្រវត្តិដូចបណ្ដាក្រុមហ៊ុនរថយន្តល្បីៗដទៃដែរ។ រយៈពេល កាលពី ២ឆ្នាំមុន យើងបានឃើញក្រុមហ៊ុនអេឡិចត្រូនិកយក្សកូរ៉េខាងត្បូងមួយនេះ បង្ហាញចក្ខុវិស័យ ចង់ប្រើប្រាស់នូវគ្រឿងយន្ត footing នៅក្នុងឧស្សាហកម្មមួយនេះ។ ហើយកាលពីពេលថ្មីៗនេះ Samsung ទទួលបានសិទ្ធិធ្វើតេស្តរថយន្ត self-driving នៅលើទឹកដីកំណើតរបស់ខ្លួនហើយ។ ឥឡូវនេះ វាអាចត្រូវបានដាក់ឱ្យបើកសាកល្បងនៅលើផ្ឡូវសាធារណៈ។
ក្រសួងដែនដីរបស់កូរ៉េខាងត្បូង បានផ្ដល់សិទ្ធិឱ្យក្រុមហ៊ុន Samsung បើកការធ្វើតេស្តសាកល្បងលើរថយន្តស្វ័យប្រវត្តិ (self-driving car) នៅលើផ្លូវសាធារណៈ។ ការធ្វើតេស្តនេះ នឹងជួយ Samsung ក្នុងការអភិវឌ្ឍប្រព័ន្ធស៊ែនសឺបច្ចេកវិទ្យាខ្ពស់ (high-tech sensors) និងម៉ូឌុលកុំព្យូទ័រ (computer modules) ជួយដោយប្រព័ន្ធឆ្លាតវៃសិប្បនិម្មិត (artificial intelligence) ដែលនឹងផ្ដល់ឱ្យរថយន្ត អាចបើកបរដោយខ្លួនឯងបាន ទោះបីស្ថិតក្នុងលក្ខខណ្ឌផ្លូវមានឧបសគ្គក៏ដោយ។
យ៉ាងណា នេះមិនមែនមានន័យថា Samsung នឹងចេញលក់រថយន្តដសល់សាធារណជននោះទេ។ Young Sohn ដែលជាប្រធានផ្នែកខាងយុទ្ធសាស្ត្ររបស់ Samsung បានអះអាងកាលពីកន្លងទៅថា ក្រុមហ៊ុនមិនចាប់អារម្មណ៍ក្នុងការផលិតរថយន្តដោយខ្លួនឯងទេ។ ការខិតខំនេះ គឺបង្ហាញពីការផ្ដោត ចង់ក្លាយខ្លួនជាក្រុមហ៊ុនមានសមត្ថភាពខ្ពស់លើការផលិតសមាសធាតុ និងជាក្រុមហ៊ុនផ្ដល់ដំណោះស្រាយដល់បណ្ដាក្រុមហ៊ុនរថយន្តធំៗ ដែលកំពុងអភិវឌ្ឍ Self-driving ទៅវិញទេ។ ជាក់ស្ដែងបច្ចេកវិទ្យា self-driving នេះ កំពុងត្រូវបានធ្វើតេស្តនៅលើរថយន្ត Hyundai។
ប្រែសម្រួល៖ រឹទ្ធិរាជ
ប្រភព៖ sammobile
