Apple នឹងប្ដឹងក្រុមហ៊ុន Qualcomm ហើយ Qualcomm ក៏ប្ដឹង Apple វិញ ពេលនេះ Qualcomm ចង់ប្ដឹង ដាក់បម្រាម Apple មិនឱ្យនាំទូរស័ព្ទ iPhone ចូលសហរដ្ឋអាមេរិកឡើយ។
ក្រុមហ៊ុនទាំងពីរ កំពុងប្ដឹងផ្ដល់គ្នា លើករណីបង់ប្រាក់ប៉ាតង់ ដែល Apple ជំពាក់ក្រុមហ៊ុន Qualcomm ហើយពេលនេះ ក្រុមហ៊ុនផលិតឈីបនេះ ចង់ប្ដឹងដាក់បម្រាមលើ Apple មិនឱ្យនាំទូរស័ព្ទ iPhone ចូលទឹកដីអាមេរិកបានឡើយ។
ទូរស័ព្ទ iPhone ត្រូវបានផ្គុំដំឡើង និងផលិតនៅក្នុងប្រទេសចិន ហើយក្រុមហ៊ុន Qualcomm ចង់បញ្ឈប់ការនាំចូល iPhone មកលើទឹកដីអាមេរិក។ ប្រសិនការដាក់បន្ទុកនេះជោគជ័យ មានន័យថា Apple នឹងមិនអាចលក់ទូរស័ព្ទ iPhone នៅទីផ្សារសហរដ្ឋអាមេរិកបានទេ។ ក្រុមហ៊ុន Qualcomm កំពុងស្នើទៅគណៈកម្មការពាណិជ្ជកម្មអន្តរជាតិ ឱ្យហាមឃាត់ក្រុមហ៊ុន Apple លើការនាំចូល iPhone មកអាមេរិកបាន ខណៈ ITC មានអំណាចក្នុងការបិទការនាំផលិតផលចូលទីផ្សារអាមេរិករបស់ Apple បានគ្រប់ពេល។
ក្រុមហ៊ុន Apple និង Qualcomm ទាំងពីរ នេះ បដិសេធមិនបញ្ចេញមតិអ្វីលើព័ត៌មានចុងក្រោយឡើយ ប៉ុន្តែប្រសិន Qualcomm អាចគ្រប់គ្រង បម្រាមនាំចូល iPhone មកទីផ្សារអាមេរិកមែននោះ វានឹងជាដំណឹងអាក្រក់សម្រាប់ Apple។ ទោះជាយ៉ាងណា គេរំពឹងថា នឹងមិនមានអ្វីកើតឡើងធ្ងន់ធ្ងរឡើយ ក្រុមហ៊ុនទាំងពីរ អាចនឹងបង្កើតកិច្ចព្រមព្រៀងណាមួយ មុនពេលកើតភាពចម្រូងចម្រាសស្រោចស្រង់លែងបាននោះ៕
ប្រែសម្រួល៖ រឹទ្ធិរាជ
ប្រភព៖ Bloomberg
